Azərbaycan, Bakı, 18 fevral/ Trend , müxbir S.Babayeva/ Fevralın sonunda "Xalq Kompüteri" layihəsinin işçi qrupu növbəti iclasını keçirəcək. Bu barədə bazar ertəsi Azərbaycanın Rabitə və İnformasiya Texnologiyaları Nazirliyindən məlumat veriblər.
"Dövlət başçısı və Microsoft korporasiyası rəhbərliyinin yanvarda Davosda görüşündən sonra layihənin reallaşdırılması fəallaşıb", - dövlət idarəsindən bildiriblər.
"Xalq Kompüteri" layihəsi əhalinin aztəminatlı təbəqələrinə aşağı faiz dərəcələri altında uzunmüddətli kreditlə kompüterlərin verilməsini nəzərdə tutur. Artıq işçi qrupu yaradılıb və Microsoft xətti üzrə layihənin yeni rəhbəri təyin edilib. O, Bakıya fevralın 20-dən sonra gələcək.
İşçi qrupunun bundan əvvəlki görüşündə Microsoft və İntel-in güzəştlər üzrə Azərbaycan tərəfinin isə, bazar vəziyyəti üzrə hökumətin gələcəkdə qəbul etməyi planlaşdırdığı ölçülər haqqında öz təkliflərini hazırlamalı olduğu qeyd edilib.
Bu il əhalinin aztəminatlı təbəqələrinə verilmək üçün 10 min kompüterin alınacağı istisna deyil.
Bunun üçün nazirlikdə bazarın öyrənilməsi və əhali arasında layihənin reallaşdırılmasının vacibliyi dərəcəsini aşkara çıxarmaq üçün sorğu keçirilməsini məqsədəuyğun hesab edirlər.
Layihə üç ilə nəzərdə tutulub. Lakin bəzi düzəlişlərin edilməsi istisna edilmir. Layihənin ümumi dəyəri hələ müəyyən edilməyib.
Layihənin son versiyası hazırlandıqdan sonra o, hökumətin müzakirəsinə veriləcək.
Rabitə Nazirliyinin təqribi hesablamalarına görə, Azərbaycanda bu gün hər 100 nəfərə 3-4 kompüter düşür. Yeni "Xalq Kompüteri" layihəsi uğurla reallaşdırılarsa, bu rəqəmi beş dəfədən çox artırmaq mümkün olacaq.