Azərbaycan, Bakı, 13 may / Trend , müxbir S.Babayeva /
Cənubi Koreyanın Poçt Administrasiyası rəhbərinin başçılığı altında nümayəndə heyətinin Bakıya səfəri gözlənilir. Bu barədə Azərbaycan Rabitə və İnformasiya Texnologiyaları Nazirliyindən deyiblər.
"İyunun 7-nə planlaşdırılan səfər çərçivəsində poçt xidmətləri sahəsində qarşılıqlı anlaşma barəsində memorandumun imzalanacağı gözlənilir", - nazirlikdən bildiriblər.
Hələ bundan əvvəl aprel ayında "Korea Post"un mütəxəssisləri Bakını ziyarət edərək Rabitə Nazirliyində və "Azərpoçt" Dövlət Müəssisəsində qarşılıqlı mənfəət gətirəcək əlaqələrin genişləndirilməsi, poçt xidmətlərinin inkişafı, loqistik xidmətlərin tətbiqi sahəsində əməkdaşlıq, elektron xidmətlərin tətbiqi üçün texniki yardım məqsədilə görüşlər keçiriblər.
Nazirlikdən deyiblər ki, koreyalılar birgə layihələrin həyata keçirilməsində maraqlıdırlar.
"Hazırda biz onlardan əməkdaşlıq sahəsində əlavə təkliflər gözləyirik", - nazirlikdən bildiriblər.
Məqalə müəllifi ilə əlaqə ünvanı: [email protected]
