Azərbaycan, Bakı, 18 noyabr / Trend , müxbir H.Vəliyev/
Bakıda 24-25 noyabr tarixlərində Avropa İttifaqının tövsiyəsi ilə "Kibercinayətkarlıqla mübarizə" mövzusunda seminar keçiriləcək. Bu barədə Azərbaycanın Rabitə və İnformasiya Texnologiyaları Nazirliyindən verilən məlumatda deyilir.
Seminar zamanı kibercinayətkarlıqla mübarizə tədbirləri, arzuolunmaz kontentlərə qarşı müqavimət üzrə intrenet provayderlərinin şəbəkə cəmiyyəti ilə əməkdaşlığı və s. məsələlər müzakirə ediləcək.
Bakıda seminar təşkil edilməsi məsələsi nazirliyin bu gün keçirilən kollegiya iclasında müzakirə olunub. İclasın gündəliyində Azərbaycanın qlobal informasiya cəmiyyətinə inteqrasiyası və elektron hökumətin formalaşdırılması məsələsi olub.
Ölkədə inkişafı üçün müvafiq şərait yaradılan elektron ticarətin tətbiq edilməsinin əsas məqsədləri müəyyənləşdirilib. Elektron tiucarətin inkişafında əsas rol telekommunikasiya infrastrukturu oynamalıdır. Son illər ərzində nazirlik tərəfindən Wi-Fi, WiMAX simsiz giriş şəbəkəsinin genişlənməsi üzrə işlər görülüb və 3G texnologiyasının tətbiq edilməsi gözlənilir.
Kollegiya zamanı milli rabitə peykinin yaradılmasına dair məlumatlar, peyki orbitə çıxaracaq şirkətlə müqavilə imzalanması üçün hazırlıq işləri və bu sahədə görülən yekun işlər elan edilib.
Məqalə müəllifi ilə əlaqə ünvanı: [email protected]