Azərbaycan, Bakı, 13 fevral / Trend , müxbir H.Vəliyev/
Azərbaycanın Rabitə və İnformasiya Texnologiyaları Nazirliyi (RİTN) fevralın 15-dən 18-dək Barselonada keçiriləcək GSMA Mobile World Congress-2010 mobil texnologiyalarının sərgi-konfransında iştirak edəcək.
Sərgi-konfransda Azərbaycanın özəl telekommunikasiya şirkətlərinin nümayəndələri də iştirak edəcək.
Dünya GSM assosiasiyası tərəfindən təşkil edilən GSMA Mobile World Congress-2010 sərgisi mobil rabitə dünyasında ən parlaq və əhəmiyyətli hadisədir. Burada rabitə operatoru, mobil qurğu isehsalçıları və multiservis provayderlərinin aparıcı nümayəndələri toplanırlar.
Tədbir günlərində simsiz rabitə bazarında lider mövqe tutan şirkətlərin top-menecment nümayəndələri mobil rabitə sənayesinin aktual mövzularının, həmçinin gələcəkdə bu sahənin inkişaf perspektivlərinin müzakirə ediləcəyi bir sıra görüş və seminarlar keçirəcəklər. Simsiz texnologiya sahəsindəki ən yaxşı nailiyyətlər Global Mobile Awards mükafatına layiq görüləcək.
Məqalə müəllifi ilə əlaqə ünvanı: [email protected]