Azərbaycan, Bakı, 15 aprel /Trend, müxbir H.Vəliyev/
Ümumdünya Əqli Mülkiyyət Təşkilatı (ÜƏMT) əqli mülkiyyət üzrə milli strategiyanın hazırlanmasında Azərbaycana yardım göstərəcək. Bu barədə Azərbaycan Dövlət Standartlaşdırma, Metrologiya və Patent Agentliyinin məlumatında bildirilir.
Məsələ Bakıda səfərdə olan ÜƏMT ekspertləri Sergey Zotin və Ron Marçant tərəfindən müzakirə olunur. Onlar milli strategiyanın hazırlanmasına dair tədbirlər planını təqdim ediblər.
İkigünlük səfər zamanı ÜƏMT ekspertləri milli strategiyanın hazırlanması ilə bağlı daxili işlər, iqtisadi inkişaf nazirlikləri, Dövlət Gömrük Komitəsi, Ali Məhkəmə, Müəllif Hüquqları Agentliyi və Milli Elmlər Akademiyasında görüşlər keçirəcəklər.
Əqli mülkiyyət üzrə milli strategiyanın hazırlanması məsələsi ötən ilin sentyabrında Azərbaycan nümayəndə heyətinin İsveçrəyə səfəri zamanı Dövlət Standartlaşdırma, Metrologiya və Patent Agentliyinin sədri Ramiz Həsənov və ÜƏMT-in baş direkloru Frensis Harri tərəfindən razılaşdırılıb.
