Azərbaycan, Bakı, 4 avqust /Trend, müxbir Q.Vəliyev/
İlin birinci yarısında Azərbaycan Rabitə və İnformasiya Texnologiyaları Nazirliyi tərəfindən İKT və poçt rabitəsi sektoruna 44,7 milyon manat investisiya qoyulub. Bu barədə nazirliyin altı ayın yekunları üzrə hazırlanan hesabatında deyilir.
Nazirliyin müəssisə və strukturları tərəfindən telefon şəbəkəsinin modernləşdirilməsinə 15,2 milyon manat investisiya qoyulub.
Regional telefon qovşaqlarının yenidən qurulmasına 6,94 milyon manat yönəldilib ki, bu da 45504 ümumi nömrə tutumlu yeni elektron ATS-lərin quraşdırılması üzrə işləri həyata keçirməyə imkan verib, uzunluğu 123,4 kilometr olan fiberoptik magistral kabellər və birləşdirici xətlər çəkilb, altı mindən çox abonent xətti istismara verilib.
İlin birinci yarısının yekunlarına görə, ölkədə 46113 nömrə tutumlu (nazirlik üzrə 28484 nömrə) yeni ATS-lər istismara verilib. Nazirliyin statistik göstəricilərinə əsasən, hazırda bütün respublika üzrə ATS şəbəkəsinin nömrə tutumu 1637227 ədəd (nazirlik üzrə 1433184 nömrə) təşkil edir.
