Azərbaycan, Bakı, 10 dekabr /Trend, müxbir H.Vəliyev/
Azərbaycan Rabitə və İnformasiya Texnologiyaları Nazirliyi bir sıra ölkələrlə tezliklərdən istifadə üzrə koordinasiya prosedurlarını başa çatdırıb. Bu barədə Trend-ə cümə günü nazirliyin Telekommunikasiya şöbəsinin baş məsləhətçisi Qulam Abdullayev deyib.
Onun sözlərinə görə, bu günə koordinasiya ilə bağlı məsələlər Belçika, Norveç, Vyetnam və Avstraliya ilə öz həllini tapıb.
Koordinasiyanın məqsədi gələcəkdə abonentlərdə problemlərin meydana gəlməsinin qarşısını almaqdır.
"Biz məsələlərin çoxu ilə bağlı Yunanıstanla da razılığa gəlmişik, yalnız bəzi bəndlər qalıb ki, onlarla da bağlı danışıqlar bu gün başa çatmaq üzrədir. Əvvəllər məlum olduğu kimi, bu məsələlər Ukrayna ilə də həll edilib, bəzi aspektlər isə Qazaxıstanla da razılaşdırılıb", - Abdullayev vurğulayıb.
Hazırda peyk sistemlərinin koordinasiyası üzrə danışqılar Koreya, İtaliya, Rusiya, Türkiyə və Monako ilə aparılır.
Milli peyk "Azerspace"in yerləşdirilməsi üçün Beynəlxalq Telekommunikasiya İttifaqı (ITU - International telecommunication Union) tərəfindən 43.2, 58.5 və 96 mövqeləri verilib.
İlkin olaraq "Azerspace" peykini Malayziyadan icarə edilən 46 dərəcəli orbital mövqedə yerləşdirmək planlaşdırılıb.
Bundan əvvəl Abdullayevin dediyi kimi, daha çox prioritet 43.2 və 58.5 mövqeləri üzrə məsələlərin razılaşdırılmasıdır.
ITU peykləri yuxarıda sadalanan mövqelərdə yerləşəcək ölkələrin siyahısını Azərbaycana təqdim edib. Peyk sisteminin yaradılmasını planlaşdıran ölkə sistemin əsas xarakteristikalarını dərc etdirir (ITU vasitəsilə), maraqları kəsişən qonşu peyk rabitəsi sisteminə malik bütün ölkələrlə razılaşdırma aparır. Orbital mövqenin tutulmasının beynəlxalq hüquqla əsaslandırılması üçün yeganə qanuni əsas ona peyk rabitəsi sisteminin digər ölkələrin sistemi ilə beynəlxalq koordinasiyası parametrləri başa çatdıqdan və onun ITU-nun registrində bildirilməsindən sonra peykin çıxarılmasıdır. Peyk prosedurla müəyyənləşdirilən müddətdə işə salınmasa, istifadə edilməmiş orbital tezlik resursu ITU tərəfindən ləğv edilir və bu mövqedə olan digər peyk sistemlərinin maraqlarına koordinasiya üçün ümumi resurslara daxil olur.
