Azərbaycan, Bakı, 27 yanvar /Trend, müxbir H.Vəliyev/
2010-ci ildə Azərbaycanın İT bazarı 29,3 milyon manat artıb. Bu barədə cümə axşamı Trend-ə Azərbaycan Rabitə və İnformasiya Texnologiyaları Nazirliyinin maliyyə və iqtisadi təhlil şöbəsinin baş məsləhətçisi Cahandar Qədirov deyib.
Qədirovun sözlərinə görə, 2010-cu ilin yekunlarına əsasən, respublikanın İT sektorunun həcmi 91,8 milyon manat təşkil edib. Bu, müqayisəli qiymətlərdə 77,6 faiz çoxdur.
"İT sektorunun alt komponentlərindən biri olan elektron detallar istehsalı 1,5 dəfə artaraq pul vahidində 1 milyon 38,8 min manata çatıb. 2010-cu ildə kompüter və kompüter periferiyasının istehsal həcmi 8 milyon 582,2 min manat təşkil edib", - o qeyd edib.
Azərbaycanın İT sektorunun ekspertlərinin qiymətləndirmələrinə görə, Azərbaycanın kompüter bazarını iki hissəyə bölmək olar: korporativ seqment və riteyl (şəxsi adamların alış-veriş etdikləri mağazalar).
2009-cu ildə yaranan maliyyə bazarının qeyri-sabitliyi riteyl seqmentində kompüter texnikasının tələbatının bir qədər azalmasına təsir göstərib. Bu onunla izah edilir ki, əhali psixoloji cəhətdən daha çox pul sərf etməyə hazır olmayıb. Riteyldən fərqli olaraq, 2010-cu ildə korporativ bazar nisbətən artım nümayiş etdirib. 2010-cu ildə dünya maliyyə böhranına baxmayaraq, Azərbaycanda kompüter bazarının 10-20 faiz artımı müşahidə olunub. Korporativ seqmentdə əsas sifarişçi qismində dövlət çıxış edir.