Azərbaycan, Bakı, 2 mart /Trend, müxbir H.Vəliyev/
Azərbaycan Rabitə və İnformasiya Texnologiyaları Nazirliyinin Dövlət Radiotezliklər İdarəsi (DRİ) Beynəlxalq Telekommunikasiya İttifaqı tərəfindən MDB ölkələri üçün təşkil edilən "Radiotezlik resurslarından istifadənin idarə edilməsinin iqtisadi üsulları" seminarının işində iştirak edəcək. Bu barədə çərşənbə günü DRİ-nin məlumatında deyilir.
Seminar martın 3-4-də Almatıda keçiriləcək.
Seminarın işində Azərbaycanı Radiotezliklər üzrə Dövlət Komissiyasının işçi qrupunun katibi Salman Hüseynov və DRİ-nin Radiotezliklər şöbəsinin rəisi Azad Rəcəbov təmsil edəcək.
Seminar iştirakçıları radiotezlik resursundan, rəqəmsal televiziya yayımının tezlik planlaşdırılmasından istifadə, radiotezlik resurslarından istifadənin dövlət tərəfindən tənzimlənməsinin təkmilləşdirilməsi məsələlərini müzakirə edəcək, radiotezlik resurslarının idarə edilməsinin beynəlxalq təcrübəsi və qiymətqoyma və dövlət səviyyəsində radiotezlik resursundan istifadənin effektivliyinin qiymətləndirilməsi məsələləri ilə tanış olacaqlar.
