Azərbaycan, Bakı, 24 noyabr /Trend, müxbir H.Vəliyev/
Azərbaycanın mobil rabitə operatoru "Azerfon" MMC-nin investisiyalarının həcmi qarşıdakı səkkiz ayda 80 milyon dollar təşkil edəcək. Trend-in məlumatına görə, bu barədə cümə axşamı jurnalistlərə "Azerfon"un baş icraçı direktoru Yurgen Pitz deyib.
Onun sözlərinə görə, vəsaitlər şəbəkənin yaxşılaşdırılmasına, o cümlədən, 4G şəbəkəsinin işə salınmasına istiqamətlənəcək.
"Bizim şirkət ən geniş yayılmış baza stansiyaları şəbəkəsinə malikdir və 2011-ci ildə Azərbaycanın bütün şəhərləri şirkətin 3G şəbəkəsi ilə əhatə olunacaq", - Pitz bildirib.
"Azerfon" üçün 4G avadanlıqlarının təchizatçısı "Nokia Siemens Network" şirkətidir.
Pitzin sözlərinə görə, bu gün "Azerfon"un respublikanın mobil rabitə bazarındakı payı 20 faizə çatır. O qeyd edib ki, ilin əvvəlindən artım 2 faiz təşkil edib.
"Şirkətin gəlirləri ilin əvvəlindən 25 faiz, müştəri bazası isə 11 faiz artıb", - o qeyd edib.