...

Azərbaycanın mobil operatoru nömrələrin daşınması xidməti üzrə ilkin qeydiyyat sistemini işə salıb

Telekommunikasiya Materials 29 Yanvar 2014 20:02 (UTC +04:00)

Azərbaycan, Bakı, 29 yanvar /Trend, müxbir H.Vəliyev/

"Bakcell" MMC mobil nömrələrin daşınması (MNP) xidmətindən istifadə etmək arzusunda olan abonentlərin ilkin qeydiyyatı sistemini tətbiq edib. Bunu çərşənbə günü Trend-ə MMC-dən deyiblər.

Şirkətdən bildiriblər ki, ilkin qeydiyyatdan keçən abonentlər xidmət istismara verildikdən sonra məlumatlandırılacaqlar. Xidmətin bu il fevralın 1-də tətbiq ediləcəyi gözlənilir: "MNP xidməti pulsuz olacaq. Mobil operatorların xidmət ödənişləri üzrə borcu olan abonentlər xidmətdən istifadə edə bilməyəcəklər".

Xidmət çərçivəsində nəzərdə tutulan aspektlərdən biri abonenti hansı şəbəkəyə zəng edəcəyi barədə məlumatlandırmaqdır, çünki şəbəkədaxili zənglərin və digər operatorların şəbəkələrinə edilən zənglərin dəyəri fərqlənir. Abonenti məlumatlandırmaqda əsas məqsəd onun digər operatorların şəbəkələrinə edilən zənglər zamanı xərclərə hazır olmasıdır.

Digər operatorların şəbəkələrə miqrasiyası zamanı SİM kartın əvəz edilməsi tələb olunur. Bir şəbəkədən digərinə miqrasiya müddəti 6 gün təşkil edəcək. Xidmət data-kartlarda istifadə edilən SİM kartlar üçün keçərli deyil. Qaydalara əsasən, 3 ay tamam olduqdan sonra xidmətdən təkrar istifadə etmək mümkün olacaq.

MNP xidmətinin tətbiqi abonentlərə operatoru dəyişəcəyi təqdirdə öz telefon nömrələrini saxlamaq imkanı verəcək. Nömrənin daşınması operatorun ayırdığı prefiks ("050", "051", "055", "070" və "077") ilə birlikdə abonent nömrəsinin tam miqrasiyasını nəzərdə tutur.

Məqalədə:
Xəbər lenti

Xəbər lenti