Bakı. Trend:
Kipr hava limanlarını idarə edən "Hermes Airports" şirkəti kiberhücuma məruz qalıb və bu hücum Larnaka və Pafos beynəlxalq hava limanlarının veb-saytının çökməsinə səbəb olub.
Trend-in Kipr Xəbər Agentliyinə istinadla verdiyi məlumata görə, şirkətin kommunikasiyalar üzrə direktoru Mariya Kurupi hücumun qarşısının alındığını bildirib. Onun sözlərinə görə, kiberhücum saytın müvəqqəti bağlanmasına və hava limanının park yerləri üçün onlayn sifarişlərin dayandırılmasına səbəb olub. Lakin sayt yalnız informasiya xarakteri daşıdığı və hava limanının əməliyyat sistemlərinə bağlı olmadığı üçün ciddi əməliyyat pozuntuları qeydə alınmayıb.
Bu hücumun arxasında "LulzSec Black" kimi tanınan haker qrupunun durduğu ehtimal edilir. Kiprdə yerləşən kibertəhlükəsizlik şirkəti Odyssey, Kiprin İsraillə müttəfiq münasibətlərinə görə siyasi motivli olduğu görünən bu hücumla bağlı oktyabrın 17-də ictimaiyyəti xəbərdar etmişdi.