Bakı.Trend:
Koreya Respublikası və ABŞ hərbi hava qüvvələri Amerikanın strateji “B-1B” bombardmançılarının iştirakı ilə hərbi təlimlər keçirib.
Trend xəbər verir ki, bu haqda KBS telekanalı Cənubi-Koreya Müdafiə Nazirliyinə istinadən məlumat yayıb.
Hərbi hava manevrləri Koreya yarımadasının hava məkanında keçirilib. Manevrlərə “B-1B” bombardmançısından savayı, “F-16” və “F-35A” reaktiv döyüş təyyarələri də cəlb edilib.
Telekanalın məlumatına əsasən, manevrlərdə məqsəd KXDR-in nüvə və ballistik raket proqramını inkişaf etdirməsi fonunda qabaqlayıcı vasitə kimi birgə potensialın nümayişi olub.
Bundan əvvəl ABŞ və Cənubi Koreya hərbi təyyarələrinin iştirakı ilə oxşar “müharibə oyunları” fevralın 20-də keçirilmişdi.