Azərbaycan, Bakı, 9 sentyabr /Trend/
Bu il sayca dördüncü dəfə təşkil olunacaq "Türkvizion" festivalında Orta Asiyanın və Balkanların 21 ölkəsi iştirak edəcək. Azərbaycanı festivalda müğənni Tünzalə Ağayeva təmsil edəcək. Bu barədə bazar ertəsi Trend-ə TRT-nin Bakı təmsilçiliyindən məlumat verilib.
Məlumatda bildirilir ki, sentyabrın 11-də Türkiyənin Dənizli şəhərində təşkil olunacaq "Türkvizion" festivalı türk dilində danışan ölkələrin sənətçilərini bir yerə toplayacaq. Dörd gün davam edəcək festivalda sənətçilər konsert proqramları ilə çıxış edəcəklər.
TRT-nin Baş direktoru İbrahim Şahinin sözlərinə görə, festivalın şüarı "Bir dil, bir ürək" olacaq və bu tədbir eləcə də xalqların bir-birlərini tanımalarında, onların arasında dostluq bağlarının meydana gəlməsində və mədəniyyətlərin tanıdılmasında böyük rol oynayacaq.
TRT-nin Bakı nümayəndəsi Yüksəl Dəğercanın verdiyi məlumata gorə, festivalda Bosniya və Herseqovina, Çinin Sinczyan-Uyğur Muxtar Vilayəti daxil olmaqla 21 ölkə iştirak edəcək.
Festival sentyabrın 14-də Bakı vaxtı ilə saat 23.00-da TRT Avaz və TRT Müzik kanalları və Azərbaycanın İctimai Televiziyası 14 ölkədə canlı yayımlayacaq.