Bakı. Trend:
Azərbaycan mədəniyyət və turizm nazirinin müavini Ədalət Vəliyev Misir Ərəb Respublikasının Azərbaycandakı fövqəladə və səlahiyyətli səfiri xanım Syuzan Cəmili qəbul edib.
Trend Mədəniyyət və Turizm Nazirliyinin saytına istinadən verdiyi məlumata görə, Azərbaycan və Misir arasında mədəniyyət və turizm sahələri üzrə əməkdaşlığın mövcud vəziyyəti və gələcək perspektivləri görüşün müzakirə mövzusu olub.
Misir və Azərbaycan arasında əməkdaşlığın bütün sahələrdə yüksək səviyyədə olduğunu qeyd edən görüş iştirakçıları gələcəkdə mədəniyyət və turizm sahələrində əməkdaşlığın genişləndirilməsinin əhəmiyyətini vurğulayıblar.
Ə.Vəliyev Misirlə mədəni əlaqələrin intensivliyinin göstəricisi olaraq mütəmadi şəkildə keçirilən qarşılıqlı mədəniyyət günlərini qeyd edib.
Görüş zamanı səfir Misirin milli bayramı – İnqilab Günü (23 iyul 1952-ci il) çərçivəsində iyulun 29-da Bakı şəhərinin mərkəzində Misir folklor qrupunun konsertinin keçirilməsində Mədəniyyət və Turizm Nazirliyi tərəfindən təşkilati dəstək göstərilməsini də xahiş edib.