Azərbaycan, Bakı, 16 may /Trend, müxbir K.Zərbalıyeva/
Bakı polisi iki avtomobildən 3 kiloqramdan artıq narkotik aşkar edib.
Daxili İşlər Nazirliyinin mətbuat xidmətindən Trend-ə verilən məlumata görə, Nərimanov rayon Polis İdarəsinin 17-ci polis bölməsinin əməkdaşlarının həyata keçirdikləri əməliyyat tədbirləri nəticəsində Bakı şəhər sakini Rövşən Əliyevin idarə etdiyi "Mercedes" markalı avtomaşına baxış zamanı 1 kiloqram 5 qram heroin aşkar edilərək götürülüb.
Əliyevin sərnişini Seyhun Mirzəyevdən isə 0,005 qram heroin götürülüb.
Nizami rayon Polis İdarəsi əməkdaşlarının keçirdiyi əməliyyat tədbirləri nəticəsində Neftçala rayon sakini, əvvəllər məhkum olunmuş Vüqar Sultanovun idarə etdiyi "Opel" markalı avtomobildən 2 kiloqramdan artıq narkotik vasitə olan həşiş aşkar edilərək götürülüb.
Hər iki faktla bağlı cinayət işi başlanıb, istintaq aparılır.