Azərbaycan, Bakı, 12 fevral /Trend/
Qax rayonuna gələn Şəki sakininin yük avtomobilindən odlu silah tapılıb.
Trend Kanal S-ə istinadən xəbər verir ki, Qax rayon Polis Şöbəsinin əməkdaşlarının keçirdiyi əməliyyat-axtarış tədbirləri zamanı rayonun Ağçay kəndi ərazisində hərəkətdə olan "Qazel" markalı yük maşınına baxış keçirilib.
Şəki rayon Cuma kənd sakini 34 yaşlı İnşallah İbrahimova məxsus avtomobilin oturacağının altına gizlədilmiş Toz-8 markalı 5,6 çaplı yivli odlu silah, eləcə də onun üzərinə baxış keçirilərkən 37 ədəd 5,6 çaplı patron aşkar edilərək götürülüb.
Qax RPŞ-yə aparılan İnşallah İbrahimov Qaxa ov məqsədilə gəldiyini bildirib. Ondan müvafiq iltizam alındıqdan sonra yaşadığı ərazini tərk etməmək şərti ilə sərbəst buraxılıb. Faktla bağlı araşdırmalar aparılır.