Azərbaycan, Bakı / Trend müxbir K.Zərbalıyeva/ Balakən rayon polis şöbəsinin əməkdaşına xəsarət yetirən rayon sakininin axtarışı davam edir. Balakən rayon prokurorunun köməkçisi Rəfael Zeynalov bazar ertəsi Trend ə bildirib ki, faktla bağlı Cinayət Məcəlləsinin 29.120.1-ci (qəsdən adam öldürməyə cəhd) və 134-cü (öldürməklə və ya sağlamlığa ağır zərər vurmaqla hədələmə) maddələri ilə cinayət işi açılıb. Hadisəni törədən Nizami Quliyevin tutulması üçün əməlyyat-axtarış tədbirləri davam etdirilir. Prokuror köməkçisinin sözlərinə görə, Quliyevin açdığı atəş nəticəsində qolundan yüngül xəsarət alan polis əməkdaşının səhhəti normaldır.
Məlumata görə, rayon sakini Quliyev iyunun 29-da evinə gələn rayon elektrik şöbəsinin əməkdaşları ilə mübahisə edib və bildirib ki, işığını kəssələr, onları öldürəcək. Məsələ ilə bağlı polis şöbəsinə məlumat verildikdən sonra, iyunun 30-da həmin ünvana polis əməkdaşları göndərilib. Quliyev ov tüfəngindən açdığı atəş nəticəsində polis əməkdaşlarından birinə xəsarət yetirib, özü isə hadisə yerindən qaçıb. Quliyevin ADP rayon təşkilatının keçmiş sədri olduğu bildirilir.