Bakı.Trend:
Asiya İnfrastruktur İnvestisiyaları Bankı (AIIB) Beynəlxalq Avtomobil Nəqliyyatı İttifaqının (IRU) üzvü olan Dayanıqlı Nəqliyyat üzrə Qlobal İnnovasiya və Bilik Mərkəzi (GSTIKC) ilə birgə Çin və Mərkəzi Asiya arasında logistika əlaqəliliyinə həsr olunmuş seminar keçirib. Tədbir çərçivəsində AIIB və IRU Orta Dəhlizin inkişafını müzakirə ediblər.
Trend bu barədə IRU-ya istinadən xəbər verir.
Tədbirdə hökumətlərin, beynəlxalq təşkilatların, maliyyə institutlarının və sahə üzrə maraqlı tərəflərin nümayəndələri iştirak edərək nəqliyyat infrastrukturu, sərhədlərarası əməkdaşlıq və regional investisiya prioritetləri ilə bağlı fikir mübadiləsi aparıblar.
Məlumata görə, tədbirdə çıxış edən IRU-nun Şərqi və Cənub-Şərqi Asiya üzrə baş nümayəndəsi Ran Van Çin–Mərkəzi Asiya marşrutlarında TIR sisteminin tətbiqində əldə olunan son nailiyyətlərdən bəhs edib. O qeyd edib ki, TIR sistemi dənizə çıxışı olmayan ölkələrin sərhədlərarası daşımaların səmərəliliyini və etibarlılığını artırmaqla əlaqələndirilmiş ticarət mərkəzlərinə çevrilməsinə kömək edir.
Ran Van fiziki infrastruktur investisiyalarının TIR kimi artıq sınaqdan çıxmış daşımaların asanlaşdırılması alətləri ilə uzlaşdırılmasının vacibliyini vurğulayıb.
“eTIR kimi rəqəmsal həllər və əsas sərhəd-keçid məntəqələrində “yaşıl dəhlizlər”in inkişafı sayəsində biz nəqliyyatı daha sürətli, daha proqnozlaşdırıla bilən və daha dayanıqlı edirik”, – deyə o əlavə edib.
Ran Van həmçinin qeyd edib ki, TIR yeni ticarət marşrutları və dəhlizlərinin inkişafına da töhfə verir.
“Buna misal olaraq IRU və tərəfdaşlarının Orta Dəhliz üzrə daşımaların təşviqi istiqamətində gördüyü işləri göstərmək olar. Digər mühüm mərhələ isə bu yaxınlarda həyata keçirilmiş ilk intermodal TIR pilot layihəsidir:
"Çin–Özbəkistan marşrutu üzrə yüklər əvvəlcə Mərkəzi Çinin Sian şəhərindən Çinin şimal-qərbində yerləşən Sincan-Uyğur Muxtar Rayonundakı Kaşqar-Şimal stansiyasına dəmir yolu ilə daşınıb, daha sonra isə İrkəştam sərhəd-keçid məntəqəsindən Özbəkistanın Cizak şəhərinə qədər TIR sistemi ilə avtomobil nəqliyyatı vasitəsilə çatdırılıb”, – deyə IRU bildirir.
Qeyd edək ki, Orta Dəhliz regionun bir sıra ölkələrindən keçən, Asiya ilə Avropanı birləşdirən nəqliyyat və ticarət marşrutudur. Bu, ənənəvi Şimal və Cənub dəhlizlərinə alternativdir.
Marşrut Çindən başlayır və Qazaxıstan, Özbəkistan və Türkmənistan kimi Mərkəzi Asiya ölkələrindən keçərək, Xəzər dənizi, Azərbaycan, Gürcüstan və Türkiyədən keçərək Avropaya çatır. Orta Dəhliz Asiyanın şərq bölgələrini, o cümlədən, Çini Avropa ilə birləşdirən, daha uzun dəniz yollarından yan keçməklə quru yolu təklif edir.