Azərbaycan, Bakı, 24 sentyabr / Trend müxbir İ.Əlizadə/ Rəsmi Bakı Türkiyənin vasitəçi kimi Dağlıq Qarabağ münaqişəsinin həllində daha yaxından iştirak etməsini istəyir.
"Azərbaycan istərdi ki, Türkiyə ATƏT-in Minsk Qrupunun həmsədri olsun" - çərşənbə günü Trend -a Azərbaycan Prezidenti İcra Aparatının Beynəlxalq əlaqələr şöbəsinin müdiri Novruz Məmmədov bildirib.
Trend - un arayışı: Ermənistan Azərbaycan ərazisinin 20 faizini - Dağlıq Qarabağı və ətrafındakı yeddi rayonu işğal edib. İşğal 1988 - ci ildən başlayıb, 1991- ci ilin dekabrınadək, Şuşa və Xocalı istisna olmaqla, Dağlıq Qarabağ Azərbaycanın nəzarətindən çıxıb. 1992 - 93 - cü illərdə isə, Şuşa, Xocalı və Dağlıq Qarabağın ətrafındakı daha yeddi rayon işğal edilib. 1994 - cü ildə Ermənistanla Azərbaycan arasında atəşkəs haqqında razılıq əldə olunub və indiyədək də tərəflər arasında sülh danışıqları davam etdirilir.
Dağlıq Qarabağ münaqişəsinin sülh yolu ilə tənzimlənməsi üçün üç ölkə - ABŞ, Rusiya və Fransa təmsilçilərinin həmsədrliyi ilə ATƏT-in Minsk Qrupu vasitəçilik edir.
"Türkiyə Azərbaycanla dost, qardaş və strateji tərəfdaş olan ölkədir və Minsk Qrupunda təmsil olunur. Amma Minsk Qrupu həmsədrliyinin formalaşdırılması konsensus yolu ilə həyata keçirilir. Ermənistanın Türkiyənin həmsədr olmasına razılıq verməsi ehtimalını sıfra bərabər hesab edirəm. Ona görə də, bununla bağlı geniş danışmaq olmur, - deyə Prezident Aparatının rəsmisi əlavə edib.
O bildirib ki, Türkiyə və Ermənistan rəhbərliyi bir necə dəfə müzakirələr aparıb. Məmmədov deyib ki, Türkiyə rəhbərliyi son proseslərin fonunda müəyyən bəyanatlar verir.
"Türkiyə rəhbərliyi ermənilərlə son danışıqlarında münaqişənin həlli ilə bağlı ortaya qoyduqları səylər nəticəsində, Ermənistan tərəfini Minsk Qrupunda təmsil olunmağa razı sala bilərlərsə, bir sıra məsələlərə aydınlıq gətirilməlidir. Format necə olacaq, hansı həmsədr oradan çıxacaq, hansı qalacaq kimi məsələlərdə razılıq olarsa, Türkiyənin Minsk Qrupunun həmsədri olması baş tutua bilər. Amma mən bunu real hesab etmirəm".
Onun fikrincə, bu gün Cənubi Qafqaz Avrasiyanın ən həssas bölgələrindən biri olduğundan, Gürcüstanla Rusiya arasında baş verən hadisələr dünyada gedən proseslərə və beynəlxalq münasibətlərə təsir göstərib. Eyni zamanda, bu hadisələr beynəlxalq münasibətlərdə sanki yeni bir vəziyyət yaradıb.
"Ona görə də, bir sıra analitiklər, mərkəzlər, bəziləri bilə-bilə, bəziləri bilməyərəkdən, beynəlxalq münasibətlərdə baş verən prosesləri nəzərə alaraq bəyan edirdilər ki, ola bilsin ki, ATƏT-in Minsk Qrupunun həmsədrləri, yaxud formatı dəyişsin. Burada daha çox formatın dəyişdirilməsindən söhbət gedirdi. Çünki bu proseslərdə Rusiya ilə ABŞ arasında bir gərginlik yaranıb və bu ölkələrin hər biri cəbhənin ayrı - ayrı tərəflərində, qarşı - qarşıya dayanıb" - Məmmədov vurğulayıb.
Prezident Aparatının rəsmisi deyib ki, buna baxmayaraq, hələlik gündəlikdə Minsk Qrupu həmsədrlərinin və yaxud formatının dəyişdirilməsi ilə bağlı məsələ yoxdur və olacağı də gözlənilmir.
"Belə məsələlərdə bir qədər səbrli olmaq lazımdır. Sadəcə olaraq, Minsk Qrupu həmsədrlərinin bölgəyə sərəfləri ayrı - ayrılıqda baş tutduğuna görə, həmsədr ölkələrin və yaxud formatın dəyişdirilməsi fikirlərinin yaranmasına səbəb oldu" - Məmmədov deyib.
Məqalə müəllifi ilə əlaqə ünvanı: [email protected]