Azərbaycan, Bakı, 20 noyabr /Trend, müxbir T.Hacıyev/
Azərbaycan Parlamentinin vitse-spikeri ATƏT-in Astana sammitində Dağlıq Qarabağ münaqişəsinin həlli ilə bağlı gözləntilərin olduğunu bildirib.
"10 ildən sonra keçirilən bu sammitdən Dağlıq Qarabağ məsələsi üzrə gözləntilərimiz çoxdur" , - şənbə günü Trend-ə Azərbaycan Parlamentinin vitse-spikeri Bahar Muradova deyib.
ATƏT-in sammiti dekabrın 1-2-də Astanada keçiriləcək və orada ATƏT üzvü olan 56 ölkənin və 12 tərəfdaş ölkənin dövlət və hökumət başçıları, eləcə də 68 beynəlxalq təşkilatın rəhbərləri iştirak edəcək. ATƏT-in sonuncu sammiti 1999-cu ildə İstanbulda keçirilib.
Muradova deyib ki, ATƏT-in Minsk qrupu həmsədrlərinin sammit ərəfəsində fəaliyyəti genişlənib.
"Dağlıq Qarabağ münaqişəsi ilə bağlı prezidentlərin dəfələrlə görüşləri olub. Nəzərə alsaq ki, Rusiyanın münaqişənin həlli istiqamətində əlavə səyləri artıb, hansısa nəticəni gözləmək olar", - Muradova əlavə edib.
Vitse-spikerin sözlərinə görə, Rusiya Prezidenti Medvedev bəyan edib ki, bu sammit çərçivəsində prinsip razılaşdırıla, prinsipləri əks etdirən sənəd imzalana bilər.
"Əlbəttə, belə bir sənəd imzalansa, danışıqlar prosesinin növbəti mərhələsi üçün çox gözəl baza ola bilər. Burada vacib şərt Ermənistanın konstruktiv mövqe nümayiş etdirməsidir", - Muradova qeyd edib.
İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının iyirmi faizi, yəni Dağlıq Qarabağ ərazisi və bu əraziyə bitişik yeddi rayon Ermənistan Silahlı Qüvvələrinin işğalı altındadır. 1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk qrupunun himayəsi altında, Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır.
BMT Təhlükəsizlik Şurasının Dağlıq Qarabağ və ətraf rayonların azad edilməsinə dair qəbul etdiyi dörd qətnaməni Ermənistan bu günə qədər yerinə yetirməyib.
