İkinci abzasdan sonra təfərrüatlar əlavə olunub (birinci xəbər saat 14:23-də yayılıb)
Azərbaycan, Bakı, 10 mart /Trend, müxbir S.Ağayeva/
Azərbaycan, Rusiya və Ermənistan prezidentlərinin Soçi görüşündə tərəflərin danışıqları davam etdirəcəkləri konstruktiv məqamlar səsləndirilib. Trend-in məlumatına görə, bu barədə Azərbaycan XİN rəhbəri Elmar Məmmədyarov mətbuat konfransında deyib.
"Prezidentlərin tövsiyəsi ilə tezliklə XİN rəhbərlərinin üçtərəfli görüşü keçiriləcək. ATƏT MQ həmsədrləri martın 15-də Bakıya gələcəklər, sonra isə Yerevana yola düşəcəklər", - o, deyib.
Nazirin sözlərinə görə, sülh prosesi üzrə işlər davam edir və bəzi məsələlər qapalı rejimdə də olsa, daha konkret şəkildə müzakirə olunur.
"Azərbaycan tərəfi bu müzakirələri davam etdirməyə hazırdır", - Məmmədyarov deyib.
İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının iyirmi faizi, yəni Dağlıq Qarabağ ərazisi və bu əraziyə bitişik yeddi rayon Ermənistan Silahlı Qüvvələrinin işğalı altındadır. 1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk qrupunun himayəsi altında, Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır.
BMT Təhlükəsizlik Şurasının Dağlıq Qarabağ və ətraf rayonların azad edilməsinə dair qəbul etdiyi dörd qətnaməni Ermənistan bu günə qədər yerinə yetirməyib.