Azərbaycan, Bakı, 31 yanvar / Trend , müxbir S.İlhamqızı/Azərbaycan Kommunist Partiyasında baş vermiş parçalanmadan sonra rəqiblərə çevrilmiş Rüstəm Şahsuvarov və Rauf Qurbanov yenidən bir araya gələ bilər. Bu barədə Trend ə Rüstəm Şahsuvarov açıqlama verib.
AKP-nin yaradıcısı Ramiz Əhmədov ötən il vəfat etdikdən sonra partiya iki yerə - sədr müavinləri Qurbanov və Şahsuvarovun tərəfdarlarına bölündü. Hər iki tərəf ayrı-ayrılıqda AKP adından öz qurultaylarını keçirdi.
Şahsuvarovun sədrlik etdiyi partiya Qurbanovu və onun tərəfdarlarını partiyadakı vəzifələrindən uzaqlaşdırdı. Qurbanovun sədrlik etdiyi AKP-də Şahsuvarov və tərəfdarlarının partiyadan uzaqlaşdırıldığı elan edildi.
Şahsuvarovun partiyasında isə bu ilin yanvarında daxili narazılıqlar yarandı. Onun dediyinə görə, bir qrup insan partiyada rəhbərliyi ələ keçirmək üçün ona qarşı çıxdılar və böhtan atmağa başladılar: "Partiyada yaranmış əvvəlki rəzalətin, qeyri-qanuni çevrilişin qurbanı indi mən oldum"-deyə AKP-nin keçmiş sədri Şahsuvarov Trend ə açıqlamasında bildirib.
Onun sözlərinə görə, bu qrupun başında Seyidağa Muradov, Fikrət Əzizov, Ələsgər Xəlilov, Hacı Hacıyev dayanır. Onlar Şahsuvarovun Moskvada kommunistləri təhqir etməkdə günahlandırıblar, sonra partiyanın möhrünü onun əlindən alıblar. Bundan sonra Şahsuvarov yanvarın 25-də sədrlikdən istefa barədə ərizə yazıb.
Onun sözlərinə görə, istefa ərizəsi qəbul edilmədən, ertəsi gün - yanvarın 26-da partiyanın Büro iclası keçirilib və orada sədrin vəzifədən uzaqlaşdırılması barədə qərar çıxarılıb. Şahsuvarovun sözlərinə görə, həmin toplantı qeyri-qanunidir, çünki yetərsay olmayıb, 31 nəfər Rəyasət Heyəti üzvlərindən cəmi 10 nəfəri iştirak edib. Həmçinin Şahsuvarov özü də qatılmayıb və onun iştirakı olmadan barəsində qərar çıxarılıb.
Şahsuvarov əlavə edib ki, hazırda həmin partiyanın sədrliyi uğrunda qeyri-qanuni şəkildə mübarizə gedir. Şahsuvarov artıq həmin partiyanı legitim hesab etmir.
"Hazırda Qurbanovun sədrlik etdiyi AKP daha legitimdir, nəinki məni devirənlərin partiyası. Mən etiraf edirəm ki, vaxtilə mənim də iştirakımla Qurbanova qarşı edilənlər indi mənim əleyhimə yönəldi və mən özüm növbəti çevrilişin qurbanı oldum. Mən gərək o vaxt Qurbanovun partiyadan uzaqlaşdırılmasına yol verməyəydim, çünki başa düşürəm ki, bu üsüllarla partiya rəhbərliyini dəyişmək yolverilməzdir"-deyə Şahsuvarov bildirib.
O, Qurbanovun partiyasına keçməyini istisna etməyib.
Qurbanov cümə axşamı Trend ə açıqlamasında bildirib ki, Şahsuvarov onun partiyasına qoşulmaq üçün müraciət edə bilər: "Siyasətdə səhvlər olur və onları bağışlamaq mümkündür. Şahsuvarov müraciət etsin və Büroda onun müraciətinə baxılıb, qərar veriləcək"-deyə Qurbanov bildirib.
O, qarşı tərəfdə baş vermiş narazılıqları isə "haqq-ədalətin öz yerini tapması" kimi qiymətləndirib. "Mən bilirdim ki, AKP-də rəhbərliyin ələ keçirilməsi üçün saxtakarlıqlar edildiyi gec-tez etiraf olunacaq. Belə hərəkətlərin nəticəsi başqa cür ola bilməzdi"-deyə Qurbanov bildirib.
