Azərbaycan, Bakı, 5 fevral / Trend , müxbir S.İlhamqızı/Dünya Azərbaycanlıları Konqresində (DAK) növbəti dəfə narazılıq yaranıb. Təşkilatın İdarə Heyətinin üzvü Eldar Qaradağlı çərşənbə axşamı Trend ə verdiyi məlumata görə, DAK sədri Qulamrza Səbri Təbrizi vəzifəsindən uzaqlaşdırılıb.
Onun sözlərinə görə, DAK-ın İdarə Heyətinin fevralın 2-də Belçikanın paytaxtı Brüsseldə keçirilən toplantısında sədrə etimadsızlıq göstərilib. Toplantıda İdarə Heyəti üzvlərindən 12 nəfərin və daha bir neçə nəfər DAK üzvünün iştirak etdiyini bildirib.
Qaradağlının sözlərinə görə, toplantıda İdarə Heyəti üzvlərindən Tofiq Məlikov, Səməd Fərtaş, Fərəməz Quluzadə, Abuzər Bağırov, Adil Minbaşı və başqaları sədrin fəaliyyətini yetərli hesab etmədiklərini deyiblər və onun istefasını tələb ediblər. Təbrizi bu tələblə razılaşmayıb.
Qaradağlının bildirdiyinə görə, toplantının sonunda Təbrizinin DAK sədriliyindən uzaqlaşdırılması, DAK-ın fövqəladə qurultayına hazırlıq üzrə təşkilat komitəsinin yaradılması və idarəçiliyin bu komitəyə verilməsi qərara alınıb. DAK-ın fövqəladə qurultayının iyunda keçirilməsinə qərar verilib.
DAK-ın koordinasiya və itnformasiya mərkəzinin rəhbəri Əli Rza Əmanbəyli Trend ə açıqlamasında bu məlumatları təkzib edib, bildirib ki, İdarə Heyətində kvorum olmadan, bir neçə nəfər şəxs sədri vəzifəsindən uzaqlaşdıra bilməz. Əmanbəyli bildirib ki, İdarə Heyətinin 17 nəfər üzvündən 12-si Qulamrza Təbrizini dəstəkləyir, qalan beş nəfər isə, ona müxalifdir.
"Qulamrza Təbriziyə qarşı çıxan şəxslərin hər biri sədrlik iddiasındadırlar. Onlar hətta öz aralarında da bir-birilərinə müxalifdirlər, çünki hamısı sədr olmaq istəyir" - deyə Əmanbəyli bildirib.
Onun sözlərinə görə, DAK-ın keçmiş sədri Cavad Derəxti və tərəfdarları təşkilat daxilində yaranan narazılıqlardan istifadə edərək, DAK-ı gözdən salır, zərbə vururlar. Əmanbəyli əlavə edib ki, Derəxtinin tərəfdarları, həmçinin, Eldar Qaradağlı və tərəfdarları ayrılıqda qurultay keçirərlərsə, bu, legitim sayılmayacaq: "Onlar qurultay keçirə bilməzlər, çünki bunun üçün kvorum yoxdur, qurultaya lazım olan sayda legitim nümayəndə yığmaları mümkün deyil"-deyə Əmanbəyli bildirib.
DAK 2003-cü ildə iki yerə bölünmüş, o vaxtkı sədr Cavad Derəxtiyə etiraz edən bir qrup ayrılaraq, DAK adından fəaliyyət göstəriblər. Sonradan həmin qrup öz təşkilatlarının adında dəyişiklik edərək,onu Demokratik DAK adlandırıblar.
DAK-ın ötən ilin yayında keçirilən qurultayında Qulamrza Təbrizi sədr seçilib. Bir neçə aydan sonra keçmiş sədr Derəxti və tərəfdarları Təbrizini fəaliyyətsizlikdə, DAK-ı iflic duruma salmaqda günahlandıraraq,onun istefasını tələb ediblər. Derəxtinin tərəfdarları DAK adından özlərinin ayrılıqda qurultayını keçirməyə hazırlaşırlar.