Azərbaycan, Bakı, 04 mart / Trend , müxbir S.İlhamqızı/ Azərbaycan İslam Partiyası qarşıdan gələn prezident seçkisində müxalifətin indiki namizədlərindən heç birinə dəstək verməyəcək.
"Dövlətçilik və milli maraqlarımızı qoruya bilən yeni siyasi qüvvə ortaya çıxarsa, biz yalnız onu dəstəkləyə bilərik"-deyə İslam Partiyasının funksioneri Akif Heydərli Trend ə açıqlamasında bildirib.
Bu ilin oktyabrında Azərbaycanda keçiriləcək prezident seçkisində bir neçə müxalifət partiyası rəhbərləri - Müsavat başqanı İsa Qəmbər, ADP sədri Sərdar Cəlaloğlu, Ümid Partiyasının sədri İqbal Ağazadə, BQP sədri Fazil Qəzənfəroğlu, BAXCP sədri Qüdrət Həsənquliyev və başqaları namizəd olacaqlarını artıq bəyan ediblər.
İslam Partiyasında hesab edirlər ki, bu namizədlərin heç biri xalqın etimadını qazanmayacaq: "İslam Partiyası Azərbaycan xalqının milli-mənəvi dəyərlərinə sahib çıxan, sərvətlərini qoruyan, insanların rifahını, həyat şəraitini yaxşılaşdıra bilən qüvvəyə səs verəcək. Hazırda isə, prezidentliyə iddia edənlər arasında belə bir şəxsi görmürük" -deyə Heydərli bildirib.
Onun fikrincə, ənənəvi olaraq seçkidə iştirak edən müxalifət liderləri xalqı dəfələrlə aldadıb, onun iradəsini, birliyini sarsıdıblar. Ona görə də islamçılar hesab edir ki, xalq bu dəfəki seçkidə onlara etimad göstərməyəcək.
Dini təmayüllü, müxalifətçi Azərbaycan İslam Partiyası 1991-ci ilin avqustunda təsis olunub, 1992-ci ildə Ədliyyə Nazirliyində qeydiyyata alınıb. 1995-ci ildə partiyanın qeydiyyatı ləğv olunub.
