Azərbaycan, Bakı, 11 mart / Trend , müxbir C.Babayeva/ Müxalifət partiyalarının gənclər təşkilatlarının təsis etdiyi "Biz" koalisiyası planlaşdırdığı etiraz aksiyasının vaxtını və keçirilmə yerini müəyyən edib. Bu barədə çərşənbə axşamı Trend a koalisiyanın həmtəsisçilərindən biri olan Müsavat Partiyasının gənclər təşkilatının sədri Tural Abbaslı məlumat verib.
Keçirilməsi planlaşdırılan etiraz aksiyasının məqsədi Azərbaycan cəmiyyətinin diqqətini mövcud aktual siyasi problemə artırmaqdır.
Abbaslının sözlərinə görə, koalisiyanın çərşənbə axşamı keçirilən iclasında etiraz aksiyasının Bakıdakı bütün universitetləri əhatə edəcəyi barədə qərar qəbul olunub.
"Aksiyanın keçirilmə vaxtı əvvəlcədən elan olunmayacaq, aksiyaya bir gün qalmış bəzi KİV nümayəndələri məlmatlandırılacaq", deyə Abbaslı bildirib.
Koalisiyada Azərbaycanın Liberal, Demokrat, Xalq Cəbhəsi, Vətəndaş və İnkişaf, Milli İstiqlal partiyalarının gənclər təşkilatları təmsil olunur. Koalisiyanın təsis olunmasında əsas məqsəd Azərbaycanın demokratik inkişafında gənclərin rolunu artırmaqdır.
Abbaslının sözlərinə görə, koalisiyada təmsil olunmaqla bağlı digər müxalifət partiyaları - Ədalət, Sosial Demokrat Partiyası və "Azərbaycan Naminə" İctimai Forumun prezidenti Eldar Namazovla danışıqlar aparılır.
Etiraz aksiyasının Novruz bayramına qədər keçiriləcəyinə əminliyini vurğulayan Abbaslı aksiyadan sonra "Biz" koalisiyasının cəmiyyətə təqdim olunacağını bildirib.
