Azərbaycan, Bakı, 23 aprel/ Trend , müxbir C.Babayeva/ Bakı Şəhər İcra Hakimiyyəti (BŞİH) müxalifət partiyalarının gənclər təşkilatlarının "Biz" koalisiyasının aprelin 24-də - qondarma "erməni soyqırımı" günündə "Azadlıq" meydanında mitinq keçirməsinə icazə verməyib. Bu barədə çərşənbə günü Trend -a koalisiyada təmsil olunan Müsavat Partiyasının gənclər təşkilatının sədri Tural Abbaslı məlumat verib.
Ermənilərin iddiasına görə, 1915-ci ilin aprelin 24-də Osmanlı İmperiyası onlara qarşı "soyqırım" törədib. Türkiyə hökuməti qondarma "erməni soyqrımı" iddialarını təkzib edir və rəsmi bəyanatlarda bildirilir ki, 1915-ci ildə Osmanlı İmperiyasında təhlükəsizliyin təmin edilməsi məqsədilə, orada yaşayan erməni əhalisinin bir yerdən digər yerlərə köçürülməsi qərarı heç bir halda "soyqırım" sayıla bilməz. Türkiyənin Baş naziri Rəcəb Tayyib Ərdoğan Ermənistana rəsmi müraciətlərində hər iki ölkənin arxivlərinin açılması, ortaq tarixçilər qrupu yaradılaraq, 1915-ci il hadisələrinin onlar tərəfindən araşdırılmasını təklif edib. Ermənistan tərəfi indiyədək bu müraciəti cavabsız qoyub.
"Biz" koalisiyasında Azərbaycanın Liberal, Demokrat, Xalq Cəbhəsi, Müsavat, Klassik Xalq Cəbhəsi, Milli İstiqlal partiyalarının gənclər təşkilatları və müstəqil gənclər təşkilatları təmsil olunur. Koalisiyanın təsis olunmasında əsas məqsəd Azərbaycanın demokratik inkişafında gənclərin rolunu artırmaqdır.
Abbaslının sözlərinə görə, BŞİH-nin cavabında mitinqin keçirilməsi üçün başqa yer də təklif olunmayıb.
"Cavabda qeyd olunub ki, "Azadlıq" meydanı Azərbaycan xalqının birliyini və mənafeyini əks etdirən tədbirlər, xalq gəzintiləri və paradlar keçirilməsi üçün nəzərdə tutulduğuna görə, koalisiyanın mitinqinə icazə verilmir", deyə Abbaslı bildirib.
Onun sözlərinə görə, "Biz" koalisiyası BŞİH-dən məhkəməyə şikayət ərizəsi hazırlayacaq və məhkəmə şikayəti təmin edilməyəcəyi halda koalisiya Avropa Məhkəməsinə müraciət edəcək.
"Biz" koalisiyası "Azadlıq" meydanında 5000-ə yaxın gəncin iştirakı ilə milli-vətənpərvərlik ruhunda mahnılardan ibarət konsert proqramı təşkil etməyi planlaşdırırdı.