Azərbaycan, Bakı, 28 aprel / Trend , müxbir S.İlhamqızı/ Bütöv Azərbaycan Xalq Cəbhəsi Parttiyasından qopmalar olması barədə bu gün yayılmış xəbərlər partiya tərəfindən təkzib olunub.
"BAXCP-nin heç bir üzvü partiyanı tərk etməyib"-deyə BAXCP sədrinin müavini Niyaməddin Orduxanlı Trend a açıqlamasında bildirib.
BAXCP-nin Bakının Nərimanov rayon təşkilatından 17 nəfər üzvün istefa verməsi barədə bəyanat yayılıb. Bəyanat müəllifləri isefalarının səbəblərini bu il seçki ili olmasına baxmayaraq, BAXCP-nin fəallığının hiss olunmaması, prezident seçkisi ilə əlaqədar bu günədək mövqe bildirməməsi ilə izah ediblər.
Bəyanatda adları çəkilən 17 nəfər bundan sonra fəaliyyətlərini "Azərbaycan Yolu" Siyasi Hərəkatında davam etdirəcəklərini bildiriblər.
BAXCP-nin sədr müavini isə bildirir ki, həmin şəxslər iki il əvvəl bu partiyanı tərk ediblər: "Həmin vaxt onlar İsgəndər Həmidovun sədrlik etdiyi Milli Demokratiya Partiyasına keçmişdilər. Görünür, İsgəndər Həmidovun istefasından sonra həmin partiyada qalmayıb, oranı tərk ediblər. Amma onların BAXCP-yə aidiyyatı yoxdur"-deyə Orduxanlı bildirib.
Onun fikrincə, bu məsələdə sadəcə BAXCP-nin adından istifadə olunur. Sədr müavininin sözlərinə görə, partiyanın Nərimanov rayon təşkilatının sədri, üzvləri partiyada fəaliyyətlərini davam etdirirlər.
Milli Demokratiya Partiyasından isə bildiriblər ki, iki il əvvəl BAXCP-dən beş nəfər onlara keçib: "Lakin ötən ilin mayından artıq həmin şəxslər bizim partiyada demək olar ki, fəaliyyət göstərmirlər. Onlar İlqar Qasımovun sədrlik etdiyi "Azərbaycan Yolu" Siyasi Hərəkatında fəaliyyət göstərirlər"-deyə Milli Demokrat Partiyasının sədr müvavini Oqtay Xəlilli Trend a açıqlamasında bildirib.
Müəlliflə əlaqə saxlamaq üçün elektron ünvan - [email protected]
