...

Azərbaycanın Qarabağ Azadlıq Təşkilatı və islamçıları İsrailə etiraz edirlər

Siyasət Materials 2 May 2008 15:47 (UTC +04:00)

Azərbaycan, Bakı,0 2 may / Trend , müxbir S.İlhamqızı/ Qarabağ Azadlıq Təşkilatı Şuşanın işğalının ildönümündə Bakıda "İsrail-Azərbaycan dostluq parkı"nın açılışına mane olmaq məqsədilə etiraz aksiyası keçirəcək. Bu barədə Trend a QAT-ın sədri Akif Nağı məlumat verib.

Mayın 8-də İsrailin Müstəqillik Günü ilə əlaqədar Bakıda "İsrail-Azərbaycan dostluq parkı"nın açılış mərasimi planlaşdırılır.

Qarabağ Azadlıq Təşkilatı Şuşanın işğalının ildönümü günündə belə bir tədbirin keçirilməsinə etiraz edir və bununla əlaqədar Azərbaycan Xarici İşlər Nazirliyinə, İsrail səfirliyinə müraciət ünvanlayıb, bu mərasimin yolverilməz olduğunu bildirib. QAT hesab edir ki, işğalın ildönümü günü bayram əhval-ruhiyyəli mərasimlərin keçirilməsi şəhidlərimizin ruhuna təhqir, Azərbaycan xalqına qarşı hörmətsizlikdir.

İsrailin Azərbaycandakı səfiri Artur Lenk "Trend News " a açıqlamasında məsələyə aydınlıq gətirib, bildirib ki, mayın 8-də İsrailin Müstəqillik Günü olduğu üçün parkın açılışının həmin günə təyin olunması məqsədəuyğun hesab edilib. "Həmçinin, mayın 8-də Azərbaycanda rəsmi səviyyədə matəm günü deyil. Səfirlik Qarabağ Azadlıq Təşkilatına təklif edib ki, Şuşada, Qarabağ uğrunda döyüşlərdə həlak olmuş şəhidlərin xatirəsinə həmin parkda ağac əkilsin. Lakin QAT bu təklifimizi qəbul etməyib"- deyə səfir bildirib.

QAT sədri isə hesab edir ki, İsrail səfirliyi bu təklifi ilə məsuliyyətdən yaxa qurtarmağa çalışır: "Biz başqa vaxt istənilən yerdə şəhidlərin ruhuna ağac əkməyə və digər belə tədbirlərdə iştirak etməyə hazırıq. Amma Şuşanın itirilməsi ilə tarixə düşmüş bir gündə təntənəli tədbirin keçirilməsi ilə razılaşa bilmərik"- deyə QAT sədri bildirib. O, əlavə edib ki, əgər İsrail səfirliyi tədbirin vaxtını dəyişməsə, mayın 8-də QAT fəalları həmin ərazidə etiraz aksiyası keçirəcək və mərasimin baş tutmamasına çalışacaqlar.

Azərbaycan İslam Partiyası da Bakıda "İsrail-Azərbaycan dostluq parkı"nın açılmasına etirazını bildirib. Partiyanın mətbuat xidmətinin rəhbəri Akif Heydərlinin Trend -a bildirdiyinə görə, İslam Partiyası parkın açılışı mərasiminin qarşısının alınması üçün Xarici İşlər Nazirliyinə müraciət təqdim edib. Heydərlinin sözlərinə görə, Partiya parkın Şuşanın işğalının ildönümündə açılması ilə yanaşı, dostluq parkının "işğalçı İsrail rejimi" tərəfindən açılmasına etiraz edir. Onun sözlərinə görə, partiyanın QAT-ın etiraz aksiyasına dəstək verəcəyi ilə bağlı qərarı hələ qəbul olunmayıb.

Azərbaycanın Şuşa şəhəri 1992-ci il mayın 8- də Ermənistan silahlı qüvvələri tərəfindən işğal olunub.

Müəlliflə əlaqə saxlamaq üçün elektron ünvan - [email protected]

Xəbər lenti

Xəbər lenti