Azərbaycan, Bakı, 02 may/ Trend , müxbir C.Babayeva/ Demokratik Seçki Mərkəzinin (DSM) mayın 12-nə planlaşdırdığı mitinqini Bibiheybət qəsəbəsində keçirməkdən imtina edəcək. Bu barədə Trend -a Mərkəzdə təmsil olunan Azadlıq partiyasının sədri Əhməd Oruc bildirib.
Bakı Şəhər İcra Hakimiyyəti müxalifəti təmsil edən Müsavat partiyasına 4 may mitinqinin keçirilməsi üçün Bibiheybət qəsəbəsini təklif edib. Partiya təklif olunan yerdə mitinq keçirməkdən imtina edib.
Yanvarın 30- da doqquz müxalifət partiyası - Klassik Xalq Cəbhəsi, Azadlıq, Milli-Demokrat, Böyük Quruluş, Bütöv Azərbaycan Xalq Cəbhəsi, Böyük Azərbaycan, Açıq Cəmiyyət, Təkamül və Yaşıllar partiyaları Demokratik Seçki Mərkəzinin yaradılması barədə qərar qəbul edib.
12 may - Bişkək sazişinin imzalanmasının ildönümü günü Bakının mərkəzi hissəsində keçirilməsi planlaşdırılan mitinqdə Azərbaycan ordusunda radikal islahatların aparılması və rəsmi Bakının Dağlıq Qarabağ münaqişəsinin sülh yolu ilə həllinə dair götürdüyü öhdəlikdən imtina etməsi tələbləri səsləndiriləcək.
1994-cü il mayın 12 - də Bişkək şəhərində imzalanmış saziş əsasında Ermənistan və Azərbaycan silahlı qüvvələrinin təmas xəttində atəşkəs rejimi tətbiq olunub və o vaxtdan indiyədək bu rejim davam edir.
Orucun sözlərinə görə, DSM yalnız Bakı Şəhər İcra Hakimiyyətinə təqdim etdiyi müraciətində göstərdiyi Bakının mərkəzi meydanlarının birində mitinq keçirməkdə israrlıdır.
DSM-in təklif etdiyi yerlər - Dənizkənarı Milli Park, Nəriman Nərimanov kino-teatrının qarşısındakı meydan, Füzuli meydanı, Elmlər Akademiyasının bağı və Cəfər Cabbarlı meydanıdır.
Məqalə müəllifi ilə əlaqə saxlamaq üçün ünvan - trend
