Azərbaycan, Bakı, 13 may / Trend , müxbir E.Babayev/ Müxalif Azərbaycan Xalq Cəbhəsi Partiyası (AXCP) prezident seçkisində iştirakını istisna etmir. "Biz seçkidə iştirak etmək istəyirik, eyni zamanda, bu seçkidə real müxalifətin vahid mövqedən çıxış etməsinin tərəfdarıyıq"- çərşənbə axşamı Trend a AXCP sədrinin müavini Fuad Mustafayev deyib.
Azərbaycanda prezident seçkisi oktyabırn 15-də keçiriləcək. Xalq Cəbhəsi, Liberal, Vətəndaş və İnkişaf partiyalarını özündə birləşdirən "Azadlıq" bloku prezident seçkisini boykot edəcəyini açıqlayıb. Blok hesab edir ki, seçki komissiyaları paritet əsasda formalaşdırılmalıdır. Lakin bu bəyanat qərar formasına salınmayıb. Blok Seçki Məcəlləsinə və "Sərbəst toplaşmaq azadlığı haqqında" Qanuna dəyişikliklərdən sonra öz qərarını rəsmi şəkildə açıqlayacaq.
Sabah Azərbaycan parlamentinin Hüquq siyasəti və dövlət quruculuğu məsələləri daimi komissiyasında Seçki Məcəlləsinə əlavə və dəyişikliklərlə bağlı layihə müzakirəyə çıxarılacaq.
Mustafayev, həmçinin, deyib ki, mövcud şərait dəyişməsə, seçkidə iştirak etməyin mənası yoxdur. "Biz mühtin dəyişməsi üçün mübarizəimizi aparırıq və ümid edirik ki, bu mübarizə nəticə verəcək. Ona görə də, paralel olaraq, seçkilərə hazırlıq işləri davam edir"- deyən Mustafayev əlavə edib.
Müxalifəti təmsil edən AXCP hazırda "Azadlıq" siyasi blokunun üzvü və həmtəsisçisidir. Partiyanın qurucusu və 2000-ci ilə qədər sədri Azərbaycanın eks-prezidenti mərhum Əbülfəz Elçibəy olub. 2000-ci ildən indiyədək AXCP-yə keçmiş dövlət katibi, sabiq deputat Əli Kərimli sədrlik edir.
Məqalə müəllifi ilə əlaqə ünvanı: [email protected]
