Azərbaycan, Bakı, 16 may / Trend , müxbir E.Babayev / Azərbaycanın hakim Yeni Azərbaycan Partiyası (YAP) hazırki dövlət başçısı İlham Əliyevin namizədliyini müdafiə edən siyasi partiyaların işini əlaqələndirmək üçün yeni qurum yaradacaq. "Seçki kampaniyasına rəsmən start veriləndən sonra həmin partiyaların işinin əlaqələndirilməsi üçün Koordinasiya Şurası şəklində qurum yaradılacaq və bu, YAP-ın seçki ilə bağlı Fəaliyyət Proqramına daxildir", deyə cümə günü Trend -a YAP icra katibinin müavini, millət vəkili Siyavuş Novruzov bildirib.
Azərbaycanda prezident seçkisi oktyabrın 15-də keçiriləcək. Hakim partiya indiki dövlət başçısı İlham Əliyevin namizədliyini irəli sürəcəyini bəyan edib. Bundan başqa, müxalif Vəhdət Partiyası, 8 partiyanı özündə birləşdirən iqtidaryönlu partiyaların Məşvərət Məclisi də İlham Əliyevin namizədliyini irəli sürəcəklərini bəyan ediblər. Azərbaycan Həmkarlar İttifaqı Konfederasiyası və Azərbaycanın Qızıl Aypara Cəmiyyəti isə ötən ay keçirilən qurultaylarında İlham Əliyevin namizədliyini rəsmən irəli sürüblər.
Novruzov bildirib ki, hakim partiya digər siyasi qüvvələrin İlham Əliyevin namizədliyinin irəli sürülməsi ilə bağlı qərarlarına biganə qalmayacaq. "Seçki Məcəlləsinə əlavə və dəyişikliklər qəbul olunduqdan və seçki qrafiki məlum olduqdan sonra biz həmin partiyaların işini koordinasiya edəcəyik" - deyə o vurğulayıb.
YAP 1992-ci ilə o vaxt Naxçıvan Ali Məclisinin sədri olan Heydər Əliyev tərəfindən yaradılıb. Azərbaycanda 14 ildən artıqdır hakim partiya olan YAP-ın indiki sədri prezident İlham Əliyevdir.
Məqalə müəllifi ilə əlaqə saxlamaq üçün ünvan - [email protected]
