Azərbaycan, Bakı, 16 may / Trend , müxbir C.Babayeva/ Azərbaycanın doqquz müxalifət partiyasının təmsil olunduğu Demokratik Seçki Mərkəzi (DSM) Bakı Şəhər İcra Hakimiyyətini (BŞİH) məhkəməyə verib. DSM-də təmsil olunan Azadlıq Partiyasının sədri Əhməd Orucun Trend -a bildirdiyinə görə, bu barədə qərar qurumun cümə günü keçirilən toplantısında qəbul olunub.
Yanvarın 30-da doqquz müxalifət partiyası - Klassik Xalq Cəbhəsi, Azadlıq, Milli-Demokrat, Böyük Quruluş, Bütöv Azərbaycan Xalq Cəbhəsi, Böyük Azərbaycan, Açıq Cəmiyyət, Təkamül və Yaşıllar partiyaları Demokratik Seçki Mərkəzinin yaradılması barədə qərar qəbul edib.
BŞİH DSM-in 12 may mitinqinin Bibiheybət qəsəbəsi meydanında keçirilməsinə icazə verib. Qurum həmin meydanda mitinq keçirməkdən imtina edib, mitinq təxirə salınıb.
DSM mitinqin keçirilməsi üçün Dənizkənarı Milli Park, Nəriman Nərimanov kinoteatrının qarşısındakı meydan, Füzuli meydanı, Elmlər Akademiyasının bağı və Cəfər Cabbarlı meydanını təklif etmişdi.
Orucun sözlərinə görə, şikayət Səbail rayon məhkəməsinə təqdim olunub.
Orucun bildirdiyinə görə, toplantıda DSM-in yenidən mitinq təyin etməsi barədə müzakirələr aparılmayıb.
Məqalə müəllifi ilə əlaqə saxlamaq üçün ünvan - [email protected]
