Azərbaycan, Bakı, 16 may / Trend , müxbir E.Babayev / İndiyə qədər heç bir təşkilat Azərbaycanın aparıcı müxalif partiyası olan Müsavatın prezidentliyə namizədi İsa Qəmbəri dəstəkləmək fikrində olduğunu açıqlamayıb. "Bu günə qədər hər hansı bir partiya bununla bağlı bizə müraciət etməyib", deyə cümə günü Trend -a Müsavatın Mərkəzi İcra Aparatının rəhbəri Arif Hacılı bildirib.
Azərbaycanda prezident seçkiləri oktyabrın 15-də keçiriləcək. Müsavatın Məclisi partiyanın başqanı Qəmbərin namizədliyini irəli sürüb. Bundan başqa, ADP sədri Sərdar Cəlaloğlunun, Yaşıllar Partiyasının sədri Mais Güləliyevin namizədliyi təmsil olunduqları təşkilatlar tərəfindən irəli sürülüb. Politoloq Eldar Namazov isə müstəqil şəkildə iştirak edəcəytini açıqlayıb. Hakim Yeni Azərbaycan Partiyası hazırki dövlət başçısı İlham Əliyevin namizədliyini yaxın aylarda keçirilməsi gözlənilən qurultayında irəli sürmək niyyətindədir.
Hacılı vurğulayıb ki, Müsavat narazı elektoratla işləmək taktikası götürüb. "Biz bu baxımdan daha çox narazı elektoratı namizədimizin ətrafında birləşdirməyə çalışacağıq. Bununla yanaşı, seçki blokunun yaradılması ilə bağlı iş də aparılacaq. Hazırda bu istiqamətdə iş aparılmasa da, seçki ərəfəsində Müsavatın ənənəvi müttəfiqləri özündə birləşdirən partiyalardan ibarət blok yaratması nəzərdə tutulur", deyə o qeyd edib.
Müxalifəti təmsil edən Müsavat Partiyası 1992-ci ildə yaradılıb. Partiyanın başqanı Qəmbər Azərbaycan Parlamentinin eks-spikeri (1992-93-cü illərdə) və 2003-cü ildə keçirilmiş prezident seçkisində prezidentliyə namizəd olub. Partiya beş nəfər deputatla Parlamentdə təmsil olunur.
Məqalə müəllifi ilə əlaqə saxlamaq üçün ünvan - [email protected]
