Azərbaycan, Naxçıvan / Trend , müxbir E.Məmmədov/ Bu ilki prezident seçkilərində 235562 naxçıvanlı iştirak edəcək. Bu barədə Naxçıvan Muxtar Respublikası Mərkəzi Seçki Komissiyasının sədri Məhərrəm Qasımov Trend in bölgə müxbirinə bildirib.
Qasımov prezident seçkilərinə hazırlıq sahəsində Naxçıvan Muxtar Respublikasında aparılan işlərdən bəhs edərək bildirib ki, hər ilin əvvəlindən may ayının 30-dək vahid seçici siyahılarının tərtibi və dəqiqləşdirilməsi prosesi gedir. Bu proses Naxçıvan MR-da fəaliyyət göstərən 7 seçki dairəsi və onları əhatə edən 275 seçki məntəqəsi üzrə müvəffəqiyyətlə başa çatdırılmış, İnformasiya Mərkəzində çap olunaraq Azərbaycan Respublikasının Mərkəzi Seçki Komissiyasına təhvil verilmişdir. Beləliklə 2008-ci il üçün vahid seçici siyahısı tərtip olunmuşdur. Həmin siyahıya əsasən muxtar respublikada seçicilərin sayı 235562 nəfər olmuşdur.
Onu da qeyd edək ki, qarşıdakı seçkilərdə iştirak edən seçicilərin 12300 nəfəri ilk dəfə səsvermə prosesində iştirak edəcək.
