Azərbaycan, Bakı, 23 iyun/ Trend , müxbir U.Sadıqova, R.Hafizoğlu/ Sunnilər və şiələrin ələvi sektası arasında hazırki toqquşmalar Livan hökumətinin zəfifliyinin nəticəsi olsa da, Dəməşqin müdaxiləsi də istisna edilmir.
"Bu toqquşmalarda Suriyanın vahid cəbhədə birləşmək təklfini dəstəkləyən ələvilər üzərində təsirə malik Suriya ordusu günahkardır", - livanlı politoloq Kərim Kərəm Trend -a bildirib.
Livanın Tripoli şəhərində sünnilər və şiə ələvi sektası arasında silahlı toqquşmaların nəticəsində dörd nəfər həlak olub, onlarla insan yaralanıb. Bu barədə iyunun 23-də Al Jazeera telekanalı məlumat verib, lakin toqquşmaların yaranmasının səbəbini göstərməyib.
"Ötən əsrin 80-ci illərindən başlayaraq, Tripoli Dəməşqin təsiri altındadır", - Kərəm bazar ertəsi telefonla Beyrutdan bildirib.
Lakin, suriyalı politoloq Hüsni Məhəlli hesab edir ki, Livan tərəfinin Suriyanın ünvanına ittihamları əsassızdır.
"Suriya ordusunun Livanı çoxdan tərk etməsi və orada heç bir suriyalı əsgərin qalmamasına baxmayaraq, son illər Dəməşqi Livanın bütün problemlərində ittiham edirlər", - Məhəlli bazar ertəsi telefonla İstanbuldan Trend -a bildirib.
Politoloqun sözlərinə görə, vaxtilə Livan hökuməti Suriyanı Baş nazir Rafiq Həririnin öldürülməsində ittiham edirdi, lakin bu indiyədək sübut edilməyib.
Məhəlli son günlərdə baş verən toqquşmaların səbəbini Baş nazir Fuad Əs-Sinyoranın başçılıq etdiyi Livan hökumətinin tam formalaşmamasında görür.
Digər Livan politoloqu Vail Yəmin Suriyanın hazırki siyasi böhranda da iştirak etdiyini göstərir.
"Suriya açıq şəkildə Livanın siyasətinə müdaxilə etmir. Onun üçün "Hizbullah" şiə qruplaşmasından öz məqsədləri üçün istifadə etmək daha sərfəlidir", - Yəmin telefonla Beyrutdan Trend -a bildirib.
Rəsmi Beyrut bununla əlaqədar heç bir bəyanat verməyib. Livanın Baş naziri Rafiq Həririnin öldürülməsindən sonra Suriya və Livanın münasibətləri heç bir şəkildə normallaşmır. Belə ki, Dəməşqi bu qətldə iştirak etməkdə ittiham edirlər.
Livanda fəaliyyət göstərən "Hizbullah" qruplaşması 1982-ci ildə, İranın eyniadlı təşkilatının filialı kimi yaradılıb. O, altı ölkədə - Avstraliya, Böyük Britaniya, Kanada, Niderland, İsrail və ABŞ-da terror təşkilatı elan edilib.
"Hazırda Livanda hakimiyyət sünni elitanın əlindədir və Suriyanın ələvi hökuməti, "Hizbullah" bununla barışa bilmir", - Yəmin hesab edir.
Müəlliflə əlaqə saxlamaq üçün elektron ünvan - [email protected]