Azərbaycan, Bakı, 30 iyul/ Trend , müxbir E.Babayev/ Hakim Yeni Azərbaycan Partiyası (YAP) prezident seçkilərini izləmək üçün müşahidəçilər ayırıb. "Bizim müşahidəçilərimiz bütün ölkə üzrə seçki prosesini müşahidə edəcəklər", çərşənbə günü Trend -a YAP icra katibinin müavini, millət vəkili Mübariz Qurbanlı bildirib.
Trend -un arayışı: Azərbaycanda prezident seçkisi oktyabrın 15-də keçiriləcək. Üç müxalifət partiyasının (Azərbaycan Xalq Cəbhəsi, Vətəndaş və İnkişaf, Liberal) təmsil olunduğu "Azadlıq" bloku isə seçkiləri boykot edəcəyi barədə qərar verib. Vətəndaş Həmrəyliyi, Kommunist, Böyük Quruluş partiyaları isə seçkidə öz namizədi ilə çıxış etməyəcək. "Azərbaycan Naminə" İctimai Forumun rəhbəri Eldar Namazov, Ümid Partiyasının sədri İqbal Ağazadə, Müasir Müsavat Partiyasaının sədri Hafiz Hacıyev, Yaşıllar Partiyasının sədri Mais Güləliyev, BAXCP sədri Qüdrət Həsənquliyev seçkidə iştirak edəcəklərini bildiriblər.
Hələ bu ilin əvvəllərindən seçkidə iştirakını bəyan edən Müsavat və Demokrat partiyaları isə avqustun 2-də seçkidə iştirak edib-etməməklə bağlı yekun qərarlarını açıqlayacaqlar. Hakim Yeni Azərbaycan Partiyası isə avqustun əvvəlində keçiriləcək qurultayında hazırki dövlət başçısı İlham Əliyevin namizədliyini irəli sürmək niyyətindədir.
Qurbanlı bildirib ki, artıq YAP-ın seçkilərin gedişatını izləyəcək müşahidəçiləri müəyyənləşib. "Onlar qanunun tələbinə uyğun olaraq bütün dairə və məntəqələrdə seçkiləri müşahidə edəcəklər", - deyən Qurbanlı müşahidəçilərin dəqiq sayı barədə əlavə məlumat verməyib. "Müşahidəçilərin sayı qanunda müəyyən olunmuş sayda olacaq", - deyə o əlavə edib.
YAP 1992-ci ildə o vaxt Naxçıvan Ali Məclisinin sədri olan Heydər Əliyev tərəfindən yaradılıb. Azərbaycanda 15 ildir hakim partiya olan YAP-ın indiki sədri prezident İlham Əliyevdir.
Məqalə müəllifi ilə əlaqə ünvanı: [email protected]
