Azərbaycan, Bakı, 05 avqust / Trend , müxbir E.Babayev/ Azərbaycanın müxalif Müsavat Partiyasının Məclis sədri partiyanın seçkilərə başqa namizədlə qoşulmasının mümkünlüyü barədə iddiaları qeyri-ciddi hesab edir.
"Müsavat Partiyası öz daxilindən başqa bir namizədə dəstək verə bilməz. Artıq Məclisin qərarı var", çərşənbə axşamı Trend -a Müsavatın Məclis sədri Sülhəddin Əkbər Müsavat üzvü, "Yeni Müsavat" qəzetinin baş redaktoru Rauf Arifoğlunun öz namizədliyini irəli sürmək niyyətində olduğu barədə bəyanatını şərh edərkən bildirib.
Trend -un arayışı: Azərbaycanda prezident seçkiləri oktyabrın 15-də keçiriləcək. Müsavat Partiyası 2007-ci ilin oktyabrında prezident seçkisində iştirak qərarı vermişdi və təşkilatın başqanı İsa Qəmbərin namizədliyini irəli sürmüşdü. Partiyanın ötən həftənin şənbə günü keçirilən iclasında isə seçkidə iştirakdan imtina qərarı verilib.
"Yeni Müsavat" qəzetinin baş redaktoru Arifoğlu isə qərarı narazılıqla qarşılayıb. O, öz namizədliyini irəli sürmək barədə düşündüyünü nəzərə çatdırıb. Eyni zamanda, Məclisin qərarının partiyadan itkilərə gətirib çıxaracağını istisna etməyib.
Əkbər isə bildirib ki, bu qərar partiyadan hər hansı itkiyə gətirib çıxara bilməz. Çünki bu qərar kollegial, açıq, şəffaf şəkildə qəbul olunub.
"Qərar jurnalistlərin iştirakı ilə geniş müzakirə olunub. 27 Məclis üzvü çıxış edib və sonda açıq səsvermə ilə məsələ həll olunub. Kimlərsə narazı qalsa belə, bu artıq Məclisin qərarıdır. Hamı buna hörmətlə yanaşmalıdır. Məclisdə qərarın əleyhinə olan şəxslər də çıxış etdilər və bildirdilər ki, seçkidə iştirakdan imtina qərarı olsa belə, bu qərara hörmətlə yanaşacaqlar", - deyən Əkbərin sözlərinə görə, Müsavatdan başqa bir namizədin olacağı gözlənilən deyil.
Müxalifəti təmsil edən Müsavat Partiyası 1992-ci ildə yaradılıb. Partiyanın başqanı İsa Qəmbər Azərbaycan parlamentinin eks-spikeri (1992-93-cü illərdə) və 2003-cü ildə keçirilmiş prezident seçkisində prezidentliyə namizəd olub. Partiya beş nəfər deputatla parlamentdə təmsil olunur.
Məqalə müəllifi ilə əlaqə ünvanı: [email protected]