Azərbaycan, Bakı, 21 avqust / Trend , müxbir E.Babayev/ Azərbaycanın müxalif Milli Vəhdət Partiyası (MVP) qarşıdan gələn prezident seçkisində hazırki dövlət başçısı, hakim Yeni Azərbaycan Partiyasının sədri İlham Əliyevin namizədliyini müdafiə edəcək.
"Biz hələ 2003 - cü il prezident seçkilərində İlham Əliyevi dəstəkləmək qərarı vermişik və bu qərara yenidən baxmağa ehtiyac duymuruq", - cümə axşamı Trend -a MVP sədri Yunus Oğuz bildirib.
Azərbaycanda prezident seçkisi oktyabrın 15 - də keçiriləcək. İndiyədək seçkidə iştirak etmək üçün16 nəfər iddialı sənədlərini MSK-ya təqdim edib.
Üç müxalifət partiyasının (Xalq Cəbhəsi, Liberal, Vətəndaş və İnkişaf) təmsil olunduğu "Azadlıq" bloku, Klassik Xalq Cəbhəsi, Açıq Cəmiyyət, Müsavat, Vətəndaş Həmrəyliyi, Demokrat, Böyük Quruluş, Azadlıq, Milli İstiqlal, Sosial Demokrat partiyaları, o cümlədən "Azərbaycan Naminə" İctimai Forumun rəhbəri Eldar Namazov seçkidə iştirakdan imtina ediblər.
Oğuz bildirib ki, öz namizədliyini verməyə zərurət görməyib. "2003 - cü ildə namizədliyimi geri götürəndə bildirmişdim ki, müxalifət 2008 -ci ilə yox, 2013 - cü il prezident seçkilərinə hazırlaşmalıdır. Seçkilərdə yüzdə yüz qələbə İlham Əliyevindir. Biz müdafiə etdiyimiz namizədin təbliğat kampaniyasında iştirak edəcəyik" - deyən Oğuz vurğulayıb ki, bu seçkilərin alternativsiz şəraitdə keçdiyi barədə bəyanatlar doğru deyil. "Artıq 16 namizəd var. Konstitusiyaya görə, istənilən vətəndaş prezidentliyə namizəd ola bilər. Hökmən deyil ki, həmin namizədlərin hamısı ənənəvi müxalifət partiyalarının təmsilçiləri olsunlar" - deyən Oğuz bildirib ki, bir sıra müxalifət partiyalarının seçkidə iştirakdan imtinasının səbəbləri də məlumdur. "Bunlar gücsüzlük, sosial bazanın sürətlə və kifayət qədər daralması və bu günün tələblərinə cavab verməməkdir"- deyə Oğuz bildirib.
Azərbaycanın Milli Vəhdət Partiyası 1999 - cu ildə yaradılıb. Vəhdət Partiyasından ayrılan bir qrup şəxs Yunus Oğuzun rəhbərliyi ilə MVP-ni təsis edib.
Məqalə müəllifi ilə əlaqə ünvanı: [email protected]