Azərbaycan, Bakı, 22 oktyabr / Trend , müxbir A.Hüseynbala/ Azərbaycan Demokrat Partiyasının müxalifətin geniş koalisiyasının yaradılması üzrə apardığı gizli danışıqların qaranlıq məqamları açılıb.
"Azərbaycan müxalifətinin daha geniş çərçivədə əməkdaşlığı ideyasını hamıdan qabaq biz vermişik. İlkin danışıqlar Müsavat Partiyası ilə aparılıb və onlar razılıq verəndən sonra biz iş bölgüsünü də razılaşdırmışıq", - müxalif Azərbaycan Demokrat Partiyasının (ADP) sədri Sərdar Cəlaloğlu çərşənbə günü Trend - a bildirib.
Trend - un arayışı: Azərbaycanın Müsavat Partiyası Müxalifətin Əməkdaşlıq Mərkəzinə daxil olan və digər siyasi təşkilatların inteqrasiyası və birgə fəaliyyətini mümkün hesab edib. O,müxalifətin geniş koalisiyasının yaradılması təklifi ilə çıxış edib.
Müxalifətin Əməkdaşlıq Mərkəzinə "Azadlıq" bloku (Azərbaycan Xalq Cəbhəsi, Liberal, Vətəndaş və İnkişaf partiyaları), Müsavat Partiaysı və "Azərbaycan Naminə" İctimai Forum daxildir. Sentyabrın əvvəlində bu siyasi təşkilatlar oktyabrın 15 - də keçirilən prezident seçkisini qanunsuz tanımaq barədə birgə bəyanat imzalamışdılar. Bəyanatda prezident seçkisindən sonra formalaşacaq hakimiyyət qeyri - legitim elan edilib.
Cəlaloğlu deyib ki, Müsavatın başqanı İsa Qəmbərlə, müxalifətin daha geniş spektrdə əməkdaşlığı üçün Klassik Xalq Cəbhəsi və Liberal partiyalarının rəhbərliyi ilə onun danışıqlar aparması qərara alınıb: "Bundan sonra biz ayrı-ayrılıqda görüşərək, ideyanı müzakirə edib ümumi nəticə əldə etmişik", - Cəlaloğlu deyib.
ADP sədri Müsavatın Mərkəzi İcra Aparatının rəhbəri Arif Hacılının indi meydana çıxıb, onun rəhbərlik etdiyi siyasi hərəkatla danışıqlar aparılacağı barədə fikirlər səsləndirməsinə təəccübləndiyini də qeyd edib.
"Mən başa düşmürəm, ideyanı verən bizik. Mirmahmud Mirəliğolu və Lalə Şövkət Hacıyeva ilə danışıqlarda əldə edilən müsbət nəticələr İsa Qəmbərlə də müzakirə olunub. Üstündən iki həftə keçəndən sonra Müsavatın guya yeni təşəbbüslə çıxış etməsi kimi oyunlardan isə, heç nə anlaya bilmirəm", - Cəlaloğlu vurğulayıb.
Onun fikrincə, bu cür qarışıq münasibətlərin Azərbaycan xalqına, eyni zamanda bu ideya ətrafında birləşən qüvvələrə hansısa mənfəət gətirəcəyini düşünmür.
" Söhbət hansı təşəbbüsdən gedir? Biz indi irəli sürülən məsələlər ətrafında hərtərəfli müzakirə aparmışıq. Danışıqların birinci raundu qurtarandan sonra Arif Hacılı ortalığa çıxıb", - ADP sədri deyib.
Cəlaloğlunun fikrincə, prezident seçkisindən öncə müxalifətin daha geniş koalisiyasının yaradılması ilə bağlı ADP -nin irəli sürdüyü ideyanı Müsavatın öz adına çıxması ümumi işə ziyan gətirə bilər.
" Söhbət tamamilə yeni bir təşəbbüsdən gedirsə, bu başqa məsələdir. Amma bizim Müxalifətin Əməkdaşlıq Mərkəzinə daxil olan siyasi hərəkatlar, eyni zamanda ADP, AMİP və KXCP ilə birgə yaradacağımız yeni qurumdan söhbət gedirsə, bu ideyanı biz İsa Qəmbərlə müzakirə etmişik, hansı işləri görəcəyimiz haqda iş bölgüsü də aparılıb", - Cəlaloğlu qeyd edib.
"Bizim Sərdar Cəlaloğlunun təşəbbüsü ilə müxalifətin daha geniş tərkibdə əməkdaşlığının baş tutması istiqamətində apardığımız müzakirələrin nəticəsinin mətbuata açıqlanması nəzərdə tutulmurdu", - çərşənbə günü KXCP sədri Mirmahmud Mirəlioğlu Trend -a bildirib.
Mirəlioğlunun sözlərinə görə, müxalifətin daha geniş spektrinin əməkdaşlığı barədə irəli sürülən fikirlər zaman -zaman dəstəklənib: "Bizim fikrimizcə, bu məsələdə müəlliflik uğrunda mübarizə aparmaq yox, inteqrasiyaya nail olmaq lazımdır. Bu məqsədlə seçkidən xeyli əvvəl hətta kimin kimlərlə görüşməsi üçün iş bölgüsü də aparılıb. Proses bu gün də davam edir", - KXCP sədri xatırladıb.
Onun sözlərinə görə, bu, iki gün öncə Müsavatın Divanında müzakirə olunan məsələ deyil: "Bu, çoxdan gündəmə gətirilən məsələdir, müzakirələr hələ də gedir", - Mirəlioğlu deyib.
KXCP sədri ideyanın kimin tərəfindən irəli sürülməsinə baxmayaraq, müxalifətin daha geniş əməkdaşlığının baş tutacağına inanır: "Hansısa funksioner öz hisslərini cilovlaya bilməyib danışsa belə, biz bunun fövqündə durmağı bacarmalıyıq. Biz bunu edə bilməyəcəyiksə, başqaları bu addımı atmalıdır", - Mirəlioğlu vurğulayıb.
" Ölkənin aparıcı siyasi qüvvələri prezident seçkisində iştirak etməmək barədə qərar qəbul edəndən sonra, onların arasında əməkdaşlıq zəruri məsələ kimi gündəmə gəlib", - çərşənbə günü müxalifətdə olan Müsavat Partiyasının başqanı İsa Qəmbər Trend -a bildirib.
Qəmbər bu məsələ ətrafında Müsavatın bir çox partiyalarla məsələhətləşmələr apardığını təsdiq edib: "Proses indi də davam edir. Bu məsələhətləşmələr nəticəsində problemlərə prinsipial müxalifət mövqeyindən yanaşan və ortaq mövqe formalaşdırmağa imkanı olan siyasi qüvvələrin əməkdaşlıq prosesi artıq başlayıb", - Qəmbər deyib.
Müsavat başqanının sözlərinə görə, əməkdaşlığın dərinləşməsi kifayət qədər realdır: " Müsavat Partiyası bu əməkdaşlıqda mövqelərin prinsipiallığını çox önəmli hesab edir, bütün mümkün variantların nəzərdən keçirilməsini məqsədəuyğun sayır", - Qəmbər vurğulayıb.
Məqalə müəllifi ilə əlaqə ünvanı: [email protected]
