Azərbayan, Bakı, 30 oktyabr/ Trend , müxbir İ.Əlizadə / Azərbaycan parlamenti hesab edir ki, "Sərbəst toplaşmaq azadlığı haqqında" Qanuna yenidən dəyişiklik edilməsinə ehtiyac yoxdur.
"Sərbəst toplaşmaq azadlığı haqqında" Qanuna dəyişiklik edilməsi məsələsi bağlanıb və gündəlikdə belə bir məsələ yoxdur", - cümə axşamı Trend -a parlament Aparatının dövlət quruculuğu üzrə qanunvericilik şöbəsinin müdiri, Azərbaycanın Venesiya Komissiyasındakı nümayəndəsi Lətif Hüseynov bildirib.
Trend -un arayışı: Azərbaycan parlamenti 2007- ci ilin mayında "Sərbəst toplaşmaq azadlığı haqqında" Qanuna əlavə və dəyişikliklər edib. Müxalifət Qanuna edilən dəyişikliklərdən narazıdır. Avropa Şurası Venesiya Komissiyasının katibi Sergey Kuznetsov bildirib ki, təmsil etdiyi qurum Azərbaycan hökumətindən "Sərbəst toplaşmaq azadlığı haqqında" Qanuna dəyişikliklər edilməsi ilə bağlı təkliflər gözləyir.
Hüseynov qeyd edib ki, Azərbaycan hökuməti Qanuna əlavə və dəyişikliklər hazırlayanda Venesiya Komissiyası ilə sıx əməkdaşlıq edilib.
"Venesiya Komissiyası Qanuna müsbət rəy verib və onun beynəlxalq standartlara uyğun olduğunu açıqlayıb. Venesiya Komissiyası "Sərbəst toplaşmaq azadlığı haqqında" Qanununa dəyşikliklərə ehtiyac olması ilə bağlı Azərbaycan tərəfinə heç bir məlumat verməyib və bu barədə bizdə məlumat yoxdur", - deyə şöbə müdiri əlavə edib. Hüseynov bildirib ki, yaxın vaxtlarda bu məsələyə yenidən qayıdılması planlaşdırılmır.
Məqalə müəllifi ilə əlaqə ünvanı: [email protected]
