Azərbaycan, Bakı, 07 noyabr / Trend , müxbirlər T. Cəfərov, B.Həsənov / Xristianlarla müsəlmanlar arasında keçirilən dialoq Xristian aləmində müsəlmanların imicini düzəltmək üçün yaxşı fürsətdir.
"Dialoqun aparılması İslam dininin xristianlara tanıdılması və onlarda İslama qarşı yanlış fikirlərin dəyişməsi üçün yaxşı fürsətdir", - deyə İranın Elm Nazirliyinin hüquq və fiqh (şəriət) Araşdırmalar Şurasının sədri Ayətullah Mehdi Hadəvi Tehrani cümə günü Qum şəhərindən Trend - a bildirib.
Noyabrın 4 - 6 - da Vatikanda 50 - dək müsəlman və xristian dini lideri arasında görüş keçirilib. Bu barədə "Timetürk" informasiya agentliyi məlumat yayıb.
Dinlərarası dialoq toplantılarının məqsədi başqa dinlər haqqında səhv məlumat və qənaətləri aradan qaldırmaqdır. Dialoqun aparılması üçün qəbul edilən əsas prinsip hər dini öz mənbələrində təqdim edildiyi kimi qəbul etmək və teoloji mübahisəyə girməməkdir. Dinlərarası dialoq prosesi 1962 - ci ildə Vatikanda XXIII Papa tərəfindən keçirilən II Vatikan Şurasının iclasından sonra daha da intensivləşib. Bu iclasda Vatikanda dinlərarası dialoqla məşğul olan bir nazirlik yaradılıb. XX əsrin ikinci yarısından aktuallaşan dinlərarası dialoq hazırda ruhanilərin və ilahiyyatçıların təşkilatçılığı ilə aparılır.
Dinlərarası dialoqu ekspertlər müsbət nəticələrə doğru addım kimi qiymətləndirirlər. Bu nəticələrdən birincisi İslam və Xristianlıq arasında ortaq məqamları üzə çıxarmaqdır.
" Bu dialoq səmavi dinlər olan İslam və Xristianlığın müştərək məqamlarının tapılmasına yaxşı şərait yarada bilər", - deyə Hadəvi bildirib.
Hadəvi hesab edir ki, dialoqun qısa müddətdə nəticəsi xristianlar və müsəlmanlar arasında dostluq və qardaşlıq yaratmaq, perspektiv nəticə isə, onlar arasında mədəniyyət sahəsində fikir mübadiləsi və əməkdaşlığa şərait yaradılması ola bilər.
Danimarkalı islamşünas Əsma Əbdülhəmid dinlərarası dialoqun Dinin əsas təməllərindən biri olduğunu hesab edir. Lakin onun fikrincə, bu dialoqun mütəmadi aparılmasına bəzi maneələr var.
"Qərbdə və Şərqdə baş verən bir sıra hadisələrə siyasi don geyindirildiyindən, dialoqun baş tutması bir qədər çətinləşir", - deyə Əbdülhəmid Kopenhagendən cümə günü telefonla Trend - a bildirib.
Səudiyyəli araşdırmaçı İsmayıl Yaşa isə, hesab edir ki, dinlərarası dialoq dinlərin yaxınlaşması və birləşməsini deyil, müxtəlif dinə mənsubların bir yerdə normal yaşamasını təmin etmək üçündür. Yaşanın fikrincə, günümüzdə məzhəblərarası dialoqu da aktuallaşdırmaq lazımdır.
"Dinlərarası dialoq, müsəlmanların və xiristanların bir yerdə yaşamasını təmin edə bilər. Bundan başqa, məzhəblər arası dialoqa da önəm verilməlidir", - deyə Yaşa Ciddədən cümə günü telefonla Trend - a bildirib.
Noyabrın 4 - 6 - da Vatikanda keçirilən görüşün məqsədi islam və xristian dinləri arasındakı gərginliyi azaltmaq üçün müştərək fəaliyyət planı yaratmaq olub. Dialoqun dünyanın iki ən böyük dini arasında mövcud olan problemlərin həlli baxımından böyük əhəmiyyət daşıdığı bildirilir. Noyabrın 6 - da Roma Papası Benedikt dialoq toplantısında çıxış edib. Toplantıda iştirak edən müsəlman dini liderlərinə Bosniyanın dini müftisi Mustafa Ceric başçılıq edib.
"İslam və Xristianlıq arasında dialoq hər iki din mənsubları arasında ixtilafların azalmasına aparan bir yoldur",- deyə Hadəvi Tehrani bildirib.
Məqalə müəllifi ilə əlaqə : [email protected]
