Azərbaycan, Bakı, 27 noyabr / Trend , müxbir A.Hüseynbala/ Azərbaycanda yeni yaradılacaq Aydınlar Partiyası hakimiyyətə qarşı konstruktiv müxalifətdə olacaq.
"Biz digər müxalif partiyaları ilə əməkdaşlıq etməyi nəzərdə tuturuq. Hakimiyyətin zorakılıqla yox, seçki yolu ilə dəyişdirilməsinin tərəfdarı olan müxalif partiya kimi fəaliyyət göstərəcəyik", - cümə axşamı Trend - a Aydınlar Partiyası Təşəbbüs Qrupunun rəhbəri Qulamhüseyn Əlibəyli bildirib.
Trend - un arayışı: Yeni yaradılacaq Aydınlar Partiyasının Təşkilat Komitəsinin bu gün keçirilən iclasında təsis qurultayının dekabrın 14 - də keçirilməsi qərara alınıb.
Avqustun əvvəllərində Əlibəyli AXCP Ali Məclisinin sədri vəzifəsindən istefa verib, sentyabrın axırında yeni Aydınlar Partiyası yaradacağı məlum olub. AXCP üzvü Nizami Quliyev də partiyadan istefa verib və Aydınlar Partiyasının sıralarına qoşulacağını bildirib.
Oktyabrın əvvəlində AXCP Lənkəran, Samux və Qax rayon şöbələrinin sədrləri istefa verərək, siyasi fəaliyyətlərini Aydınlar Partiyasında davam etdirəcəklərini bildiriblər.
Əlibəyli Aydınlar Partiyasının 2009 - cu il bələdiyyə və 2010 - cu il parlament seçkilərində digər müxalif partiyalarla əməkdaşlığının mümkünlüyünü də istisna etməyib. "Amma bu əməkdaşlıq, yaxud hansısa partiyalarla blokda birləşib, seçkidə iştirak etmək məsələsi yaranmış şəraitdən asılı olacaq", - Əlibəyli vurğulayıb.
Təşəbbüs Qrupunun rəhbəri deyib ki, təmtəraqlı təsis qurultayı keçirmək niyyətləri yoxdur. "Bu, sadəcə, təsis qurultayıdır. Ona görə heç bir siyasi partiyadan və qeyri-hökumət təşkilatından nümayəndə dəvət etməyəcəyik", - Əlibəyli qeyd edib.
Qulamhüseyn Əlibəyli 1992-1993 - cü illərdə prezident Elçibəyin müşaviri və parlamentdə rəsmi nümayəndəsi, 1995 - 2005 - ci illərdə Məclisin deputatı olub. Avropa Şurası Parlament Assambleyasında Azərbaycan nümayəndə heyətinin üzvü seçilib. O, 1989-cu ildən AXC-nin üzvü, 1993 - cü ildən AXCP Ali Məclisinin sədri idi.
Məqalə müəllifi ilə əlaqə ünvanı: [email protected]