İran, Tehran, 10 dekabr / Trend , müxbir A.Namdari / İran parlamentinin nümayəndəsi bildirib ki, İran əhalisinin 25 faizini sünnilər təşkil edir və yerli rəsmilər öz qərarlarında ölkədəki dini azlıqların maraqlarını da nəzərə almalıdır.
İran parlamentinin Səravan şəhər nümayəndəsi Əbdüləziz Cəmşidzehi Trend -a açıqlamasında, İranın cənub-şərqində sünni məzhəbli "Condullah" terrorçu qruplaşmasının fəaliyyətini tənqid edərək bildirib ki, İranın Sistan və Bəluçustan əyalətində bu cür fəaliyyətlər qəbul olunmazdır.
"Condullah" terrorçu qruplaşması bir neçə ildir ki, İranın Sistan və Bəluçustan əyalətində yerli hökumətə və əhaliyə qarşı silahlı basqınlar törədir. Son vaxtlar "Condullah" tərəfindən givrov götürülmüş İran Sərhəd Polisi Xidmətinin 14 əməkdaşı güllələnib. Cəmşidzehinin sözlərinə görə, qətlə yetirilmiş şəxslərin cəsədləri hələ də tapılmayıb.
İran parlamentinin Milli Təhlükəsizlik Komissiyasının katibi Kazim Cəlali bildirib ki, "Condullah" terrorçu qruplaşmasının bəzi üzvləri artıq həbs olunub. Onlar İran Sərhəd Polisi Xidmətinin 14 əməkdaşının qətlində təqsirli bilinirlər və yaxın günlərdə mühakimə olunacaqlar.
Cəmşidzehi isə "Condullah" terrorçu qruplaşmasının bəzi üzvlərinin həbsi haqda xəbərsiz olduğunu bildirib.
"Sistan və Bəluçustan əyaləti İranın digər əyalətləri ilə müqayisədə daha təhlükəlidir. Dövlət rəsmiləri bu əyalətdə sabitliyi pozan amilləri aradan qaldırmaq məqsədilə əsaslı təbirlər görməlidir", - deyə Cəmşidzehi çərşənbə günü Trend -a müsahibəsində bildirib. Cəmşidzehi dövlət rəsmilərini ölkə əhalisinin 25 faizini təşkil edən sünnilərin maraqlarını nəzərə almağa çağırıb.
Müəlliflə əlaqə saxlamaq üçün elektron ünvan [email protected]