Azərbaycan, Bakı, 15 dekabr/ Trend , müxbir N.Abdullayeva/ Azərbaycan və Kuba arasında iqtisadi əməkdaşlıq üzrə hökumətlərarası komissiyasının ikinci iclasını gələn ilin yanvarında keçirmək planlaşdırılır, - Kubanın Azərbaycandakı səfiri Marselo Tores bazar ertəsi Trend -a bildirib.
Kubanın hökumət nümayəndə heyətinə dövlət naziri Rikardo Kabrisasa rəhbərlik edəcək, - Tores əvvəllər Trend -a bildirib.
Ötən ildən ölkələr arasında iqtisadi münasibətlər yeni mərhələyə qədəm qoyub. 2007-ci ilin sonunda Havanada Azərbaycan və Kuba arasında iqtisadi əməkdaşlıq üzrə hökumətlərarası komissiyanın ilk iclası keçirilib. İclasın gedişində iqtisadi əlaqələrin cari vəziyyəti və onların inkişaf perspektivləri müzakirə olunub.
Səfər çərçivəsində mədəniyyət, ticarət, idman, turizm və energetika sahəsində ona yaxın layihə nəzərdən keçiriləcək.
Azərbaycanın rəsmi statistikasına görə, 2008-ci ilin birinci yarısı ərzində ölkələr arasında xarici ticarət dövriyyəsi ixracat həcmi sıfır olmaqla, 8,3 min dollara bərabər olub. Lakin Azərbaycan mallarının ixracı hesabına yalnız iyul ərzində mal dövriyyəsi 156 min dollaradək artıb.
Müəlliflə əlaqə saxlamaq üçün elektron ünvan: [email protected]
