Azərbaycan, Bakı, 15 may / Trend , müxbir C.Babayeva /
Azərbaycan Prezidenti yanında Strateji Araşdırmalar Mərkəzinin (SAM) rəhbəri Elxan Nuriyev mayın 12-13 tarixlərində ABŞ-a səfəri çərçivəsində Nyu-Yorkda, Kolumbiya Universiteti nəzdində Enerji, Dəniz Nəqliyyatı və İctimai Siyasət Mərkəzində "Enerji və digər təbii sərvətlər sahəsində investisiya münasibətlərində münaqişələrin qarşısının alınması və idarə edilməsi" mövzusunda təşkil olunmuş konfransda iştirak edib.
SAM-ın mətbuat xidmətinin verdiyi məlumata görə mayın 13-də bu forumun "Geniş dialoq siyasəti: ümumi baxışların tapılmasına yönəlmiş qlobal və regional təşəbbüslər" adlı birinci sessiyasında əsas məruzəçi qismində çıxış edib.
Mərkəzin rəhbəri öz məruzəsində Azərbaycanın balanslı xarici siyasət kursunu həyata keçirməsinin səbəblərini açıqlayıb, mövcud münaqişələrin ədalətli həlli və region ölkələrinin ümumi əmin-amanlığı və rifahı naminə dövlətimizin qonşu ölkələrlə sıx əməkdaşlığa can atdığını tədbir iştirakçılarının nəzərinə çatdırıb.
Forum çərçivəsində Nuriyev Beynəlxalq və İctimai Əlaqələr məktəbinin dekanı Con Kotsvorsla görüşüb. Cənab Kotsvors ali təhsil və siyasi elmlər üzrə tədqiqatlar sahəsində Azərbaycanın beyin mərkəzləri və ali təhsil müəssisələri ilə sıx əlaqələrin qurulmasında maraqlı olduğunu bildirib. O, Kolumbiya Universitetinin Azərbaycana bir necə istiqamətlər üzrə, məsələn, dövlət qulluqçularının və dövlət rəsmilərinin idarəetmə sahəsində təhsili, elmi tədqiqatla məşğul olan alimlərin mübadiləsi sahəsində köməklik edə biləcəyini qeyd edib. O, azərbaycanlı tələbələrin Beynəlxalq və İctimai Əlaqələr məktəbində elmi dərəcə almağa daha çox maraq göstərəcəklərinə ümidvar olduğunu vurğulayıb.
Kolumbiya Universiteti Enerji Dəniz Nəqliyyatı və İctimai Siyasət Mərkəzi (CEMTPP) ilə birgə 16 may tarixində Azərbaycan Demokratik Respublikasının 91-ci ildönümünə həsr olunmuş "The First Pax Trucica" konfransına da ev sahibliyi edəcək.
SAM rəhbərinin ABŞ-a davam edən səfəri zamanı onun bu ölkənin aparıcı beyin mərkəzlərində Azərbaycanın xarici siyasətinə, dövlətimizin dünya enerji təhlükəsizliyi sistemində oynadığı rol və üzləşdiyi Qarabağ probleminə həsr olunmuş çıxışları gözlənilir.
Məqalə müəllifi ilə əlaə ünvanı - [email protected]
