Azərbaycan, Bakı 20 iyul / Trend , müxbir A.Hüseynbala /
Azərbaycanın iqtidaryönlü partiyası bələdiyyə seçkilərində iştirak edəcək namizədlərin siyahısını müəyyənləşdirib.
"Bizim partiya ölkənin bütün bələdiyyələrinə namizədlərini irəli sürmək niyyətindədir", - bazar ertəsi Trend -a Demokratik Azərbaycan Dünyası Partiyasının (DADP) sədri Məmməd Əlizadə bildirib.
Trend -un arayışı: Azərbaycanda bələdiyyə seçkisi 2009-cu ilin dekabrında, parlament seçkisi isə 2010-cu ilin payızında keçirilməlidir. Bundan əvvəl iki dəfə - 1999 və 2004-cü illərdə yerli özünüidarəetmə orqanlarına seçkilər keçirilib.
May ayında Azərbaycan parlamentində "Bələdiyylərin birləşdirilməsi haqqında" qanun qəbul edilib. Qəbul edilən qanuna görə, Azərbaycanda bələdiyyələrin sayı 2757-dən 1766-ya enib.
Əlizadənin sözlərinə görə, artıq partiyanın İdarə Heyəti də bələdiyyə seçkisində təkbaşına iştirak etmək barədə qərar çıxarıb.
"İqtidaryönlü bir neçə partiyanın bələdiyyə seçkisində birgə iştirak etməklə bağlı niyyətimiz baş tutmadı. Bu səbəbdən seçkidə ancaq öz namizədlərimizin uğur qazanması üçün çalışacağıq", - partiya sədri əlavə edib.
Əlizadə deyib ki, siyahısını müəyyənləşdirdikləri bələdiyyə üzvlüyünə namizədlərin adlarını seçkilərə rəsmi start veriləndən sonra açıqlayacaqlar.
Hakimiyyətyönlü Demokratik Azərbaycan Dünyası Partiyası (DADP) 1992-ci ildə təsis olunub və 1993-cü ildə Ədliyyə Nazirliyi tərəfindən dövlət qeydiyyatına alınıb. Təşkilata Məmməd Əlizadə rəhbərlik edir. Partiya 1993-cü ildə hakimiyyətə gələn Yeni Azərbaycan Partiyasının siyasətini dəstəkləyir.
Məqalə müəllifi ilə əlaqə ünvanı: [email protected]