Azərbaycan, Bakı, 27 iyul / Trend , müxbir, A.Hüseynbala /
Azərbaycanın bir qrup müxalifət partiyasının birləşdiyi hərəkat bələdiyyə üzvlüyünə namizədlərin müəyyənləşdirilməsi prosesini dayandırıb.
"Bələdiyyələrin birləşdirilməsi haqqında" qanunun qəbul olunmasından sonra bələdiyyələrin hansı əraziləri əhatə edəcəyi dəqiqləşdirilmədiyindən, namizədlərimizin konkret haradan irəli sürülməsini dəqiqləşdirə bilmirik", - bazar ertəsi Trend -a "Qarabağ və Respublika Uğrunda Hərəkat" da təmsil olunan Azərbaycan Demokrat Partiyasının (ADP) sədri Sərdar Cəlaloğlu bildirib.
Trend -un arayışı: Azərbaycanda bələdiyyə seçkisi 2009-cu ilin payızında, parlament seçkisi isə 2010-cu ilin payızında keçirilməlidir. Bundan əvvəl iki dəfə - 1999 və 2004-cü illərdə yerli özünüidarəetmə orqanlarına seçkilər keçirilib.
May ayında Azərbaycan parlamentində "Bələdiyylərin birləşdirilməsi haqqında" qanun qəbul edilib. Qəbul edilən qanuna görə, Azərbaycanda bələdiyyələrin sayı 2757-dən 1766-ya enəcək.
Cəlaloğlunun sözlərinə görə, "Bələdiyyə haqqında" qanuna görə, bələdiyyə üzvlüyünə namizədlər yalnız yaşayış yerindən verilə bilər. "Biz də bələdiyyələrin birləşmədən sonra hansı əraziləri əhatə edəcəyini bilmədiyimizə görə konkret namizədləri müəyyənləşdirə bilmirik. Bu problem aradan qaldırılandan sonra konkret namizədlərin müəyyənləşdirilməsinə başlanılacaq", - partiya sədri əlavə edib.
Hərəkatda təmsil olunan partiyaların bələdiyyə seçkilərində ümumi namizədlər siyahısı ilə iştirakına gəldikdə, ADP sədri deyib ki, bu məsələ dəfələrlə müzakirə olunub. "Konkret qərara gələ bilməməyimizin səbəbi yenə də bələdiyyələrin birləşdirilməsi ilə bağlıdır. Qanuna görə, seçkilərdə bir neçə siyasi qüvvənin blok kimi, yaxud partiyanın ayrılıqda iştirakı üçün konkret say göstərilib. Məsələn, bələdiyyələrin 1/3-i qədər namizəd irəli sürüldükdə blok kimi, 1/2-i qədər namizəd irəli sürüldükdə isə partiya müstəqil olaraq seçkilərdə iştirak edə bilər", - Cəlaloğlu vurğulayıb.
ADP sədrinin fikrincə, bələdiyyələrin sərhədləri tam dəqiqləşdiriləndən sonra hərəkatda təmsil olunan qüvvələrin vahid siyahı ilə seçkilərdə iştirakına nail olmaq lazımdır.
"Qarabağ və Respublika Uğrunda Hərəkat"ı martın 18-də Konstitusiyaya təklif olunan əlavə və dəyişikliklərlə bağlı keçirilən referendum ərəfəsi Azərbaycan Xalq Cəbhəsi, Vətəndaş və İnkişaf, Liberal, Demokrat, Müsavat və Ümid partiyaları, eləcə də bir neçə ictimai təşkilat təsis edib.
Sаğ təmаyüllü partiya olan ADP 1991-ci ildə Sərdar Cəlaloğlu tərəfindən təsis edilib. Partiya 2007-ci ilin yanvarınadək iqtidara qarşı radikal müxalif mövqedə olub. 2008-ci ilin yanvarında ADP-nin hakimiyyətlə dialoq qurulmasu ilə bağlı yeni siyasi kursu qəbul edilib. Buna etiraz olaraq keçmiş sədr Rəsul Quliyev və tərəfdarları ADP-dən imtina edərək özlərinin Açıq Cəmiyyət Partiyasını yaradıblar.
Məqalə müəllifi ilə əlaqə ünvanı: [email protected]