Azərbaycan, Bakı, 25 sentyabr / Trend , müxbir C.Babayeva /
Müxalif Azərbaycan Milli İstiqlal Partiyası (AMİP) hesab edir ki, müxalifət düşərgəsində müstəqil siyasət yürütməyən partiyalar səmimi və davamlı birlik yarada bilməzlər.
"Azərbaycanın müxalifət partiyaları arasında səmimi birlik mövcud deyil. Bunun bir səbəbi siyasi qüvvələrin liderlərinin ambisiyalarından əl çəkə bilməmələridir. Onlar ambisiyalarından geri çəkilmələrini güzəşt və məğlubiyyət kimi dəyərləndirirlər. Digər səbəb əksər partiyaların bu və ya digər şəkildə müəyyən sponsorlar və siyasi qüvvələrdən asılı olmalarıdır. Ona görə də onlar istər-istəməz müstəqil siyasi xətt yürüdə bilmirlər. Partiya liderləri arasında səmimi münasibətin, inamın olmaması da birliyin yaranmasına və davamlı olmasına imkan vermir", - cümə günü Trend -a AMİP-in mətbuat və təbliğat katibi Əli Orucov bildirib.
Orucov müxalifət partiyaları arasında inteqrasiya əvəzinə parçalanmanın, qarşıdurmaların və soyuq münasibətlərin dərinləşməsindən təəssüfləndiyini bildirib. "Bunlar həm partiyaların özlərinə, həm də cəmiyyətə pis təsir göstərir. Cəmiyyətdə müxalifət partiyalarının birliyinə inam azalır", - o deyib.
Müxalifət düşərgəsində birliyin yaradılmasına manelər yaradan partiyaların olub-olmamasına gəlincə, Orucov deyib ki, narazılıq yaradan qüvvələdən biri Azərbaycan Xalq Cəbhəsi Partiyasıdır. "Əli Kərimlinin çox zaman sözləri ilə əməlləri üst-üstə düşməyib. Bu gün Kərimlinin özü də müstəqil siyasət yeridə bilmir, rəhbərlik etdiyi partiya müstəqil qərarlar verə bilmir, çünki onlar bu və ya digər sponsorlardan asılıdırlar", - o bildirib.
Orucovun fikrincə, müxalifət düşərgəsində səmimi və davamlı birliyinin yaradılması üçün partiyalar maliyyə cəhətdən müstəqil olmalı, ambisiyalardan bir qədər əl çəkməli və partiya liderləri müxalifəti birləşdirən məqamların daha çox olduğunu dərk etməlidirlər.
Məqalə müəllifi ilə əlaqə ünvanı: [email protected]
