Azərbaycan, Bakı, 06 yanvar / Trend , müxbir E.Tariverdiyeva/
İqtisadi blokadadan zərər çəkən Ermənistan Türkiyəyə güzəştə getməkdə və Türkiyə-Ermənistan arasındakı sərhədlərin açılması üzrə müqavilələrə dair işlərin davam etdirilməsində maraqlıdır, Türkiyə üzrə amerikalı ekspert Maykl Günter (Michael Gunter) belə hesab edir.
"Razılaşdırılanları həyata keçirmək üçün hər iki tərəf güzəştə getməlidir", - bu barədə amerikalı ekspert, ABŞ Tennesi Texnologiya Universitetinin siyasi elmlər professoru Maykl Günter Trend -a bildirib. Lakin Azərbaycan və Dağlıq Qarabağ tərəflər üçün ən ciddi maneə olaraq qalır.
Dekabrın 10-da Ermənistan və Türkiyənin XİN rəhbərləri Sürixdə Ermənistan və Türkiyə arasındakı münasibətlərin normallaşdırılmasına dair protokollar imzalayıblar. İki ölkə arasındakı diplomatik münasıbətlər 1993-cü ildən kəsilib.
İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının iyirmi faizi, yəni Dağlıq Qarabağ ərazisi və bu əraziyə bitişik yeddi rayon Ermənistan Silahlı Qüvvələrinin işğalı altındadır. 1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk qrupunun himayəsi altında, Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır.
BMT Baş Assambleyasının Dağlıq Qarabağın və işğal olunmuş ərazilərin azad edilməsinə dair qəbul etdiyi dörd qətnaməni Ermənistan bu günə qədər yerinə yetirməyib.
Ekspertin fikrincə, Ermənistanla münasibətlər normallaşarsa Türkiyə qonşuları ilə problemin olmamasından fayda əldə edəcək.
Son zamanlar, iki köhnə rəqib arasındakı "Futbol diplomatiyası" əlavə məsələlər üzrə gələcəkdə daha sıx əməkdaşlığın yaranacağına ümid verib, Günter belə hesab edir.
"Əgər hər iki ölkə, 2009-cu ilin oktyabrında Sürixdə imzalanan, diplomatik münasibətlərin yaradılması və ölkələr arasındakı əlaqələrin inkişaf etdirilməsi barədə müqaviləni ratifikasiya edərsə bu Türkiyə-Ermənistan münasibətlərinin gələcək inkişafına yardım edəcək", - bu barədə Günter deyib.
